جمعہ، 28-نومبر،2025
جمعہ 1447/06/07هـ (28-11-2025م)

رجنی کانت کے مداحوں کیلئے افسوسناک خبر آگئی

29 اکتوبر, 2025 11:14

بھارتی فلم انڈسٹری کے مشہور اداکار رجنی کانت اور دھنوش کو حالیہ دنوں میں دھمکی آمیز ای میلز موصول ہوئی ہیں، جن میں ان کے گھروں میں بم نصب کرنے کا دعویٰ کیا گیا تھا۔

تامل ناڈو پولیس ذرائع کے مطابق ریاستی ڈائریکٹر جنرل آف پولیس (ڈی جی پی) کو دو الگ الگ ای میلز موصول ہوئیں۔ ان ای میلز میں یہ دعویٰ کیا گیا کہ رجنی کانت اور دھنوش کے گھروں میں دھماکا خیز مواد رکھا گیا ہے۔ اطلاع ملتے ہی تینام پیٹ پولیس اور بم ڈسپوزل اسکواڈ رجنی کانت کی رہائش گاہ پر حفاظتی جانچ کے لیے پہنچ گئے۔

پولیس کے مطابق پہلی ای میل پیر کی صبح تقریباً ساڑھے آٹھ بجے موصول ہوئی، جس پر فوراً کارروائی کی گئی۔ تاہم، اداکار رجنی کانت کے سیکیورٹی عملے نے بتایا کہ ان کے گھر میں کسی مشکوک شخص کا داخل ہونا یا کوئی غیر معمولی سرگرمی نہیں دیکھی گئی۔ اس لیے سیکیورٹی چیک کی اجازت نہیں دی گئی اور بم اسکواڈ کی خدمات لینے سے انکار کر دیا گیا۔

اسی روز شام تقریباً ساڑھے چھ بجے ایک اور ای میل موصول ہوئی۔ تاہم، اس بار بھی رجنی کانت کی ٹیم نے سیکیورٹی چیک کرانے سے انکار کر دیا۔ اس کے بعد اداکار دھنوش کو بھی اسی نوعیت کی دھمکی والی ای میل موصول ہوئی۔ انہوں نے بھی پولیس کی مدد لینے سے انکار کیا۔

پولیس حکام کا کہنا ہے کہ حالیہ دنوں میں کئی دیگر مشہور شخصیات کو بھی ایسی ہی جعلی دھمکی آمیز ای میلز موصول ہوئی ہیں۔ تامل ناڈو کی سائبر کرائم ونگ نے ای میلز کے ماخذ کا سراغ لگانے کے لیے تحقیقات شروع کر دی ہیں۔

ذرائع کا کہنا ہے کہ اس سے قبل 2 اکتوبر کو بھی ڈی جی پی کو دھمکی آمیز ای میلز بھیجی گئی تھیں، جن میں مختلف وی آئی پیز کے دفاتر اور رہائش گاہوں پر بم نصب ہونے کا دعویٰ کیا گیا تھا۔ ان میں اداکارہ تریشا کرشنن کا تینام پیٹ میں واقع گھر اور شیکھر کا منڈاویلی میں واقع گھر بھی شامل تھے۔

یاد رہے کہ 9 اکتوبر کو پولیس نے ایک 37 سالہ شخص کو گرفتار کیا تھا جس نے تاملگا ویتری کزگم کے سربراہ وجے کی رہائش گاہ پر بم رکھنے کی جھوٹی دھمکی دی تھی۔ پولیس کا کہنا ہے کہ تازہ واقعے میں بھی انہی عناصر کے ملوث ہونے کا امکان ہے جو پہلے بھی ایسی دھمکیاں دیتے رہے ہیں۔

Catch all the انٹرٹینمنٹ News, Breaking News Event and Trending News Updates on GTV News


Join Our Whatsapp Channel GTV Whatsapp Official Channel to get the Daily News Update & Follow us on Google News.

اوپر تک سکرول کریں۔