صبا قمر کے مداحوں کیلئے تشویشناک خبر آگئی

معروف اداکارہ صبا قمر نے اپنی صحت کے حوالے سے انکشاف کیا ہے۔

پاکستان کی معروف اداکارہ صبا قمر نے حال ہی میں اپنے ایک انٹرویو میں یہ انکشاف کیا ہے کہ ذہنی دباؤ کے باعث انہیں دل کا معمولی دورہ پڑا۔ اگلے ہی روز انجیوگرافی کی گئی، لیکن اللہ کا شکر ہے کہ وہ اب بہتر محسوس کر رہی ہیں۔

صبا قمر نے اپنے کیریئر اور ذاتی زندگی کے حوالے سے کھل کر بات کی اور خاص طور پر ذہنی صحت کے موضوع پر اپنے تجربات شیئر کیے۔ ان کا کہنا تھا کہ "ہم سب سمجھتے ہیں کہ ہم بہت مضبوط ہیں اور ہر قسم کے حالات کا سامنا کر لیں گے، لیکن یہ حالات ایک دن ہارٹ اٹیک، انزائٹی اور ڈپریشن کی صورت اختیار کر سکتے ہیں۔”

اداکارہ نے بتایا کہ حال ہی میں انہیں ذہنی دباؤ کی وجہ سے معمولی ہارٹ اٹیک کا سامنا کرنا پڑا۔ اس کے بعد ان کی انجیوگرافی کی گئی۔ صبا قمر کا کہنا تھا کہ "ڈاکٹروں نے مجھے ہارٹ اٹیک کی بیس وجوہات بتائیں، اور یہ ضروری نہیں کہ ہارٹ اٹیک صرف کولیسٹرول کی وجہ سے ہو۔ کبھی کبھار تناؤ یا ذہنی تکلیف بھی ہمارے جسمانی اعضا کو متاثر کرتی ہے۔”

صبا قمر نے کہا کہ ہم نے آج تک ذہنی صحت کو اتنی سنجیدگی سے نہیں لیا، حالانکہ یہ سب سے زیادہ اہم ہے۔ وہ لوگوں کو یہی پیغام دینا چاہتی ہیں کہ ذہنی صحت کو نظر انداز نہ کریں۔

یاد رہے کہ اس سال یکم اگست کو صبا قمر کو دوران شوٹنگ اچانک طبیعت خراب ہونے کے باعث اسپتال میں داخل کرایا گیا تھا۔ فیملی ذرائع کے مطابق ڈاکٹروں نے ان کو ایک ماہ آرام کرنے کا مشورہ دیا تھا۔ اس وقت ان کی صحت کے بارے میں تشویش کا سامنا تھا، مگر اب وہ بہتر ہیں۔