صارفین اب ٹک ٹاک سے زیادہ پیسے کما سکیں گے؛ مگر کیسے؟ مکمل طریقہ جانیے

ٹک ٹاک نے اپنے سبسکرپشن ماڈل میں اہم تبدیلیاں کی ہیں جس سے صارفین اب زیادہ پیسے کما سکیں گے۔

 کمپنی نے ایک کانفرنس میں اعلان کیا کہ اب ٹک ٹاک سبسکرپشنز سے حاصل ہونے والی آمدنی کا 90 فیصد حصہ صارفین کو دیا جائے گا۔ اس سے پہلے، ٹک ٹاک سبسکرپشن کی آمدنی کا 70 فیصد حصہ اپنے صارفین کو دیتا تھا، مگر اب اسے بڑھا کر 90 فیصد کر دیا گیا ہے۔

مگر اس نئے ماڈل سے فائدہ اٹھانے کے لیے کچھ شرائط پوری کرنا ضروری ہیں۔ سبسکرپشن ماڈل میں اس تبدیلی کے لیے صارف کے فالوورز کی تعداد کم از کم 10 ہزار ہونی چاہیے۔ اس کے علاوہ صارف کی ویڈیوز کو گزشتہ ماہ کم از کم ایک لاکھ ویوز ملنے چاہیے اور اس نے گزشتہ ماہ تین یا اس سے زائد سبسکرپشن اونلی ویڈیوز پوسٹ کی ہوں۔

ٹک ٹاک کی جانب سے جاری کردہ بیان میں کہا گیا کہ جتنا زیادہ آپ اپنے مواد میں تسلسل دکھائیں گے، اتنا زیادہ پیسہ کما سکیں گے۔ سبسکرپشنز کی فیس سے صارفین کو اپنے پسندیدہ کریئٹرز کے خصوصی مواد، چینلز، اسٹیکرز اور دیگر خصوصی فیچرز تک رسائی حاصل ہوگی۔ اس کے علاوہ سبسکرپشن کا عمل صارفین کو اپنی کمیونٹی کو مزید مستحکم کرنے میں بھی مدد دے گا۔

فی الحال یہ تبدیلی امریکا اور کینیڈا میں لاگو کی جا رہی ہے، لیکن ٹک ٹاک کا کہنا ہے کہ آنے والے مہینوں میں اسے دنیا کے دیگر ممالک میں بھی متعارف کرایا جائے گا۔ ٹک ٹاک نے بتایا کہ امریکا اور کینیڈا کے علاوہ دیگر ممالک میں سبسکرپشن پروگرام کے تحت 50 فیصد آمدنی صارفین کو ملتی تھی، مگر اب اسے بڑھا کر 70 فیصد کر دیا جائے گا۔

یہ تبدیلی ٹک ٹاک کے سبسکرپشن پروگرام کو مزید پرکشش بناتی ہے، جس میں صارفین کو خصوصی بیجز، سبسکرائبر اونلی پوسٹس، چیٹ فیچرز اور دیگر سہولتوں تک رسائی ملے گی۔ سبسکرپشن صارفین کو اپنے پسندیدہ کریئٹرز سے خصوصی مواد تک رسائی کے لیے ماہانہ فیس ادا کرنا ہوتی ہے۔