ویرات کوہلی کی 37ویں سالگرہ پر انوشکا شرما نے اہم رازوں سے پردہ اٹھادیا

بھارتی کرکٹ ٹیم کے سابق کپتان ویرات کوہلی آج اپنی 37ویں سالگرہ منا رہے ہیں۔ اس موقع پر دنیا بھر سے مداح انہیں نیک تمنائیں بھیج رہے ہیں اور ان کے شاندار کرکٹ کیریئر کو یاد کر رہے ہیں۔

ویرات اور انوشکا کی پہلی ملاقات 2013 میں ایک اشتہار کی شوٹنگ کے دوران ہوئی۔ دونوں کے درمیان دوستی شروع ہوئی جو آہستہ آہستہ محبت میں بدل گئی۔ کئی سال تک اپنے تعلق کو میڈیا سے چھپانے کے بعد، یہ جوڑی دسمبر 2017 میں اٹلی میں سادہ مگر یادگار شادی کے بندھن میں بندھ گئی۔

انوشکا شرما نے ایک انٹرویو میں بتایا کہ انہوں نے اپنے بہترین دوست سے شادی کی۔ ان کے مطابق "ویرات ایک ایسے انسان ہیں جو بہت سادہ، مخلص اور محبت کرنے والے ہیں۔ جب ہم ایک ساتھ ہوتے ہیں تو ایسا لگتا ہے جیسے دنیا رک گئی ہو۔”

انہوں نے شادی کے ابتدائی دنوں کی مشکلات بھی شیئر کیں۔ انوشکا نے کہا کہ "شادی کے پہلے چھ ماہ میں ہم صرف بائیس دن ایک ساتھ گزار سکے۔ مصروف شیڈول کے باوجود، ہم ہمیشہ ایک دوسرے کے لیے وقت نکالنے کی کوشش کرتے ہیں۔”

انوشکا نے ویرات کی یادداشت کی تعریف کرتے ہوئے کہا کہ ان کی بہترین یادداشت نے انہیں متاثر کیا۔ "میں اکثر چیزیں بھول جاتی ہوں، لیکن ویرات ہر چھوٹی بات یاد رکھتے ہیں۔ تب مجھے یقین ہوا کہ وہ ایک ذمہ دار شریکِ حیات بنیں گے۔”

یہ جوڑی اب دو بچوں کے والدین ہیں، بیٹی وامیکا اور بیٹا آکائے۔ دونوں اس وقت لندن میں مقیم ہیں اور اکثر اپنی فیملی کے ساتھ پرسکون زندگی گزارنے کی تصاویر سوشل میڈیا پر شیئر کرتے ہیں۔

ویرات کوہلی کی سالگرہ کے موقع پر سوشل میڈیا پر مداحوں نے انہیں “کنگ کوہلی” کے لقب کے ساتھ خراجِ تحسین پیش کیا۔ ان کے مداحوں کا کہنا ہے کہ ویرات صرف ایک بہترین کھلاڑی نہیں بلکہ ایک مثالی شوہر اور باپ بھی ہیں۔