معروف یوٹیوبر رجب بٹ پر ایک بار پھر حملہ

سٹی کورٹ کراچی میں معروف یوٹیوبر رجب بٹ پر وکلاء کے ایک گروہ کی جانب سے حملہ کیا گیا جس کے نتیجے میں وہ شدید زخمی ہوگئے۔ حملے کے دوران رجب بٹ کے منہ اور جبڑے سے خون بہنے لگا، جس نے عدالتی احاطے میں ہنگامی صورتحال پیدا کر دی۔

ذرائع کے مطابق رجب بٹ عدالت میں عبوری ضمانت حاصل کرنے کے لیے پیش ہوئے تھے کہ اچانک کچھ وکلاء نے ان پر حملہ کر دیا۔ تشدد کے بعد انہیں فوری طبی امداد کی ضرورت پیش آئی اور پولیس و عدالتی عملے نے موقع پر پہنچ کر حالات قابو میں کیے۔

واقعے کے اس وقت تک اسباب واضح نہیں، اور وکلاء تنظیموں کی جانب سے بھی اس پر کوئی باضابطہ بیان جاری نہیں ہوا۔ واقعے کے بعد سٹی کورٹ کے احاطے میں خوف و ہراس پھیل گیا، جبکہ سائلین اور دیگر افراد نے تشویش کا اظہار کیا۔

عدالت نے رجب بٹ کی عبوری ضمانت 13 جنوری تک بڑھا دی۔ عدالتی کارروائی مختصر رہی، اور زخمی یوٹیوبر کو اسپتال منتقل کیا گیا۔ قریبی ذرائع کے مطابق رجب بٹ کی حالت خطرے سے باہر ہے، تاہم مزید معائنہ جاری ہے۔

پولیس حکام نے تحقیقات شروع کر دی ہیں اور عدالتی احاطے میں موجود کیمروں کی فوٹیج حاصل کی جا رہی ہے۔ پولیس نے واضح کیا کہ ذمہ داران کے خلاف قانون کے مطابق کارروائی ہوگی اور کسی کو بھی قانون ہاتھ میں لینے کی اجازت نہیں دی جائے گی۔