نعمان اعجاز کے طنز پر فیصل قریشی کا شاندار ردعمل وائرل

شوبز انڈسٹری میں بیانات اور تبصروں کا تبادلہ معمول کی بات ہے، مگر اصل اہمیت اس بات کی ہوتی ہے کہ فنکار ردعمل کس انداز میں دیتے ہیں۔

حالیہ دنوں ایک انٹرویو میں نعمان اعجاز کے ایک جملے نے سوشل میڈیا پر بحث چھیڑ دی، جس پر بعد ازاں فیصل قریشی نے نہایت مثبت اور شائستہ انداز اپنایا۔

ایک نجی ٹی وی کی رمضان نشریات کے دوران فیصل قریشی سے نعمان اعجاز کے اُس بیان کے بارے میں سوال کیا گیا جس میں انہوں نے ہنستے ہوئے کہا تھا کہ وہ میک اپ پر زیادہ انحصار نہیں کرتے اور نہ ہی وہ ہمایوں سعید یا فیصل قریشی ہیں جنہیں اس کی ضرورت ہو۔

ان کا کہنا تھا کہ وہ کردار میں ڈھلنے پر توجہ دیتے ہیں اور سادہ انداز اپناتے ہیں۔

اس سوال کے جواب میں فیصل قریشی نے معاملے کو خوش اسلوبی سے سمیٹتے ہوئے کہا کہ اگر ایسا کہا بھی گیا ہے تو اسے منفی انداز میں نہیں لینا چاہیے۔ نعمان اعجاز کا مقصد ہرگز کسی کو کمتر دکھانا نہیں ہو سکتا۔

انہوں نے مسکراتے ہوئے کہا کہ نعمان اعجاز اپنی شخصیت اور اداکاری کی وجہ سے نمایاں مقام رکھتے ہیں اور ممکن ہے وہ صرف اپنے کام کے انداز کی وضاحت کر رہے ہوں۔

فیصل قریشی نے کہا کہ سوشل میڈیا پر اکثر بات کا ایک رخ نمایاں ہو جاتا ہے جس سے غیر ضروری تنازع جنم لیتا ہے۔