بھارتی اداکار ای اے راجندرن انتقال کر گئے

ممبئی میں بھارتی فلم انڈسٹری کے سینئر اداکار اور ہدایتکار ای اے راجندرن 71 سال کی عمر میں انتقال کر گئے۔

بھارتی میڈیا کے مطابق ای اے راجندرن گزشتہ چند ماہ سے علیل تھے اور جمعرات کو انتقال کرگئے۔ ان کی آخری رسومات جمعہ کو ان کے آبائی علاقے تری تھلور میں ادا کی جائیں گی۔

ای اے راجندرن کا تعلق ایک معروف فنکار گھرانے سے تھا۔ وہ اداکار موکیش کے بہنوئی اور معروف تھیٹر ڈائریکٹر او مادھون کے داماد تھے۔ انہوں نے او مادھون کی بیٹی اور موکیش کی بہن سندھیا سے شادی کی اور کولم میں سکونت اختیار کی۔

راجندرن نے 1981 میں فلم "گریشمن” سے اپنے فلمی کیریئر کا آغاز کیا۔ انہوں نے پانچ دہائیوں پر محیط کیریئر میں 50 سے زائد فلموں میں اداکاری کے جوہر دکھائے۔ ان کی آخری فلم "اورو پرم کلیاٹم” 2023 میں ریلیز ہوئی۔