متوازن غذا کے باوجود وزن کم نہ ہونے کی وجہ سامنے آگئی

متوازن غذا کے باوجود وزن کم نہ ہونے کی وجہ سامنے آگئی ہے۔

لاکھ کوششوں کے باوجود اگر وزن کم نہیں ہو رہا، تو اس کی وجہ چند عام غلطیاں ہو سکتی ہیں۔ ماہرین صحت کا کہنا ہے کہ متوازن غذا اور ورزش کے باوجود بہت سے افراد ان غلطیوں کا شکار ہو جاتے ہیں، جو وزن کم کرنے میں رکاوٹ بنتی ہیں۔

حالیہ ایک رپورٹ میں ان غلطیوں کو واضح کیا گیا ہے، جن پر قابو پا کر وزن کو مؤثر طریقے سے کنٹرول کیا جا سکتا ہے۔

خوراک کی زیادتی: کیلوریز پر نظر رکھیں

اگر آپ ڈائٹنگ کر رہے ہیں لیکن وزن کم نہیں ہو رہا، تو ہو سکتا ہے کہ آپ ضرورت سے زیادہ کھا رہے ہوں۔ ماہرین کے مطابق وزن کم کرنے کے لیے کیلوریز کی مقدار کو کنٹرول کرنا ضروری ہے۔ ہاں یہ ضروری نہیں کہ آپ بھوکے رہیں، بلکہ صرف اس وقت کھائیں جب بھوک محسوس ہو۔

ورزش کا صحیح طریقہ: میٹابولزم بڑھانے کا راز

روزانہ ورزش میٹابولزم کو بہتر بناتی اور دل کی صحت کو مستحکم رکھتی ہے، لیکن شرط یہ ہے کہ ورزش اپنی صحت کے مطابق ہو۔ بے ترتیب ورزش کے بجائے ماہرین سے مشورہ کر کے ایک مناسب روٹین بنائیں۔

صحت بخش غذا کا انتخاب: تازہ اور متوازن غذا ہی حل ہے

صرف خوراک کی مقدار ہی نہیں بلکہ اس کا معیار بھی اہم ہے۔ پھل، سبزیاں، اناج، دودھ، انڈے، گوشت اور مغزیات سے بھرپور غذا صحت کو بہتر بناتی ہے۔ دوسری طرف پیکٹ والی خوراک میں موجود مصنوعی اجزاء وزن کم کرنے کے عمل کو سست کر سکتے ہیں۔

پروٹین کی اہمیت: ناشتے میں پروٹین کو ترجیح دیں

وزن کم کرنے کے لیے پروٹین سب سے اہم جزو ہے۔ اگر ناشتے میں پروٹین والی غذائیں (جیسے انڈے، دہی، مٹر) شامل کی جائیں، تو دن بھر بھوک کم محسوس ہوتی ہے، جس سے غیر ضروری کھانے سے بچا جا سکتا ہے۔

زیادہ مقدار میں صحت مند غذا بھی نقصان دہ

صحت بخش غذائیں بھی اگر ضرورت سے زیادہ کھائی جائیں تو وزن کم نہیں ہوتا۔ لہٰذا خوراک کی مقدار اور کیلوریز پر نظر رکھنا ضروری ہے۔

نیند اور روزمرہ کی عادات: وزن پر گہرا اثر

نیند کی کمی اور غیر منظم معمولات بھی وزن میں اضافے کا سبب بنتے ہیں۔ طویل کام کے اوقات اور بے ترتیب شیفٹس صحت پر منفی اثر ڈال سکتی ہیں۔ ماہرین کا مشورہ ہے کہ مناسب نیند اور پرسکون زندگی وزن کم کرنے میں اہم کردار ادا کرتی ہے۔