خون میں شوگر لیول جانچنے کا نیا اور آسان طریقہ سامنے آگیا

ذیابیطس کے مریضوں کیلئے خون میں شوگر لیول جانچنے کا نیا اور آسان طریقہ سامنے آگیا ہے۔

رپورٹ کے مطابق بنگلورو کے انڈین انسٹیٹیوٹ آف سائنس کے سائنسدانوں نے اس کا ایک متبادل طریقہ دریافت کیا ہے جو بغیر کسی چوٹ یا تکلیف کے باآسانی کام کرے گا۔

نئی تحقیق کے مطابق سائنسدانوں نے "فوٹو اکو سٹک سینسنگ” نامی ٹیکنالوجی (Photoacoustic sensing technology) تیار کی ہے، جس میں لیزر شعاعوں کی مدد سے خون میں گلوکوز کی سطح معلوم کی جاسکتی ہے۔ یہ طریقہ جسم کے ٹشوز پر شعائیں ڈال کر ان میں ہونے والی معمولی حرکات کا پتہ لگاتا ہے۔

اس دوران پیدا ہونے والی ہلکی سی وائبریشن کو خاص ڈٹیکٹرز کے ذریعے محسوس کیا جاتا ہے پھر ان آواز کی لہروں کی شدت کو مدنظر رکھتے ہوئے خون میں گلوکوز کی مقدار کا تعین کیا جاتا ہے۔

ماہرین نے بتایا کہ یہ طریقہ نہ صرف محفوظ اور آسان ہے بلکہ زیادہ درست اور بہتر نتائج بھی فراہم کرتا ہے۔

اگر یہ تکنیک مزید کامیاب ثابت ہوئی، تو مستقبل میں ذیابیطس کے مریضوں کو روزانہ سوئی کے استعمال کی ضرورت نہیں رہے گی اور ایک آسان اور جدید طریقے سے وہ اپنی صحت کی نگرانی کرسکیں گے۔