آم کھانے کے شوقین افراد ہوجائیں خبردار!

کوٹ ادو میں آم کے شوقین افراد کے لیے خبردار کرنے والی خبر سامنے آئی ہے جہاں غیر قانونی طور پر کیلشیم کاربائیڈ کا استعمال کر کے آم پکانے والوں کے خلاف کارروائی کی گئی ہے۔

 موسم گرما کے آغاز پر بازار مختلف اقسام کے آموں سے بھر جاتے ہیں جن میں انور رٹول، لنگڑا، سندھڑی، چونسہ، طوطا پری اور دسہری شامل ہیں۔ آم کے شوقین افراد اس موسم کا بے صبری سے انتظار کرتے ہیں تاکہ تازہ اور میٹھے آموں کا مزہ لے سکیں۔

 تاہم، فوڈ اتھارٹی نے اس حوالے سے خطرے کی گھنٹی بجا دی ہے کیونکہ کیلشیم کاربائیڈ کے ذریعے آم پکانا ممنوع اور صحت کے لیے نقصان دہ ہے۔

ڈائریکٹر آپریشنز فوڈ اتھارٹی شہزاد مگسی کی نگرانی میں 216 مختلف مقامات پر چھاپے مارے گئے جن میں فروٹ منڈیوں، دکانوں، گاڑیوں اور باغات کا بھی دورہ کیا گیا۔ اس کارروائی کے دوران 117 کلوگرام کیلشیم کاربائیڈ اور 95 کلوگرام آم ضبط کر کے تلف کر دیے گئے۔ فوڈ اتھارٹی نے حفظان صحت کی خلاف ورزی پر 94 ہزار روپے جرمانہ بھی عائد کیا ہے۔

فوڈ اتھارٹی کے حکام نے واضح کیا کہ کیلشیم کاربائیڈ ایک کیمیائی مادہ ہے جو نمی کے ساتھ تعامل کرکے ایسیٹائیلین گیس پیدا کرتا ہے، جس سے آم جلد پک جاتے ہیں، لیکن اس کے استعمال میں شامل آرسینک اور فاسفورس جیسے زہریلے مادے صحت کے لیے انتہائی نقصان دہ ہیں۔

 عوام سے اپیل کی گئی ہے کہ وہ کیلشیم کاربائیڈ سے پکائے گئے آموں سے پرہیز کریں تاکہ اپنی اور اپنے خاندان کی صحت کو محفوظ رکھ سکیں۔