الائچی کے صحت پر ناقابل یقین فوائد

الائچی ایک خوشبودار مصالحہ ہے جو اپنی خوشبو، ذائقے اور طبی خصوصیات کی بدولت نہ صرف کھانوں کا ذائقہ بڑھاتی ہے بلکہ صحت کے لیے بھی بے شمار فوائد رکھتی ہے۔

 سائنسدانوں کے مطابق الائچی میں موجود اینٹی آکسیڈنٹس بلڈ پریشر کو کم کرنے میں مددگار ثابت ہوتے ہیں۔ ایک تحقیق میں ہائی بلڈ پریشر کے مریضوں کو روزانہ تین گرام الائچی پاؤڈر دینے کے بعد بارہ ہفتوں میں ان کا بلڈ پریشر نارمل ہو گیا۔

علاوہ ازیں، جانوروں پر کی گئی تحقیق سے معلوم ہوا ہے کہ الائچی کینسر سے لڑنے والے خلیات کو مضبوط بناتی ہے اور ٹیومرز کی نشوونما کو کم کرتی ہے۔

الائچی کے دیگر طبی فوائد میں اینٹی بیکٹیریل خصوصیات، جسم میں سوزش میں کمی، سانس لینے میں بہتری، شوگر کنٹرول، جگر کی حفاظت اور وزن میں کمی شامل ہیں۔ کچھ تحقیقات یہ بھی ظاہر کرتی ہیں کہ یہ ذہنی دباؤ اور بے چینی کو کم کرنے میں مددگار ثابت ہو سکتی ہے۔

مزید برآں، الائچی معدے کی بیماریوں جیسے متلی، بدہضمی اور السر میں بھی مفید ہے اور معدے کو نقصان دہ بیکٹیریا سے محفوظ رکھتی ہے۔ یہ منہ کی بدبو دور کرنے اور دانتوں کے امراض سے بچاؤ کے لیے بھی صدیوں سے استعمال ہوتی آ رہی ہے۔

اگرچہ زیادہ تر مطالعات جانوروں اور لیبارٹری تجربات پر مبنی ہیں، ماہرین کا ماننا ہے کہ روزمرہ کے کھانوں میں الائچی کو شامل کرنا صحت کے لیے فائدہ مند اور محفوظ ہے۔