روزانہ بادام کھانے سے آپ کن امراض سے خود کو محفوظ رکھ سکتے ہیں؟

بادام صحت کیلئے انتہائی مفید گری ہے جو جسم کو متعدد غذائی اجزاء فراہم کرتی ہے اور کئی دائمی امراض سے بچاؤ میں مددگار ثابت ہوتی ہے۔

ماہرین کے مطابق بادام میں موجود ورم کش اور اینٹی آکسائیڈنٹس خصوصیات مختلف بیماریوں سے بچاؤ میں معاون ہیں۔ تحقیق میں بتایا گیا ہے کہ روزانہ 45 گرام بادام کھانے سے بلڈ کولیسٹرول کی سطح کو قابو میں رکھا جا سکتا ہے، جس سے دل کی بیماریوں بشمول فالج اور ہارٹ اٹیک کا خطرہ کم ہوتا ہے۔

کینسر کے خطرے میں بھی بادام مفید ثابت ہوئے ہیں۔ مختلف تحقیقی رپورٹس کے مطابق بادام میں موجود مرکبات کینسر کی مخصوص اقسام کے خلاف تحفظ فراہم کرتے ہیں، خاص طور پر خواتین میں بریسٹ کینسر کا خطرہ کم ہوتا ہے۔ روزانہ 28 گرام گریاں کھانے سے کینسر سے موت کے امکانات 21 فیصد تک کم ہو جاتے ہیں۔

بادام دل کی صحت کے لیے بھی فائدہ مند ہے، کیونکہ یہ بلڈ پریشر اور کولیسٹرول کی سطح کو کم کرنے میں مدد دیتا ہے اور دل کی شریانوں کے افعال کو بہتر بناتا ہے۔ ذیابیطس کے مریضوں کے لیے بھی بادام مفید ہے کیونکہ اس میں کاربوہائیڈریٹس کی مقدار کم اور پروٹین زیادہ ہوتی ہے، نیز اس میں میگنیشم موجود ہوتا ہے جو بلڈ شوگر کو کنٹرول میں رکھنے میں مددگار ہوتا ہے۔

بادام وزن کم کرنے میں بھی معاون ہیں۔ تحقیق سے معلوم ہوا ہے کہ بادام کھانے سے بھوک میں کمی آتی ہے اور اس کے استعمال سے لوگ کم کیلوریز لیتے ہیں، جس سے جسمانی وزن میں کمی ممکن ہوتی ہے۔ اس کے علاوہ باداموں میں کیلشیئم کی وافر مقدار ہوتی ہے جو ہڈیوں اور دانتوں کو مضبوط بناتی ہے اور ہڈیوں کے بھربھرے پن کے خطرے کو کم کرتی ہے۔

جِلد کی صحت پر بھی بادام کے مثبت اثرات ہیں۔ وٹامن ای، اینٹی آکسائیڈنٹس اور فیٹی ایسڈز کی موجودگی سے جِلد ہموار اور جھریوں سے پاک رہتی ہے۔ وٹامن ای سے دل کی بیماریوں، کینسر، دماغی تنزلی اور بینائی کے مسائل سے بچاؤ میں بھی مدد ملتی ہے۔

بادام میں موجود اینٹی آکسائیڈنٹس جسم کو تکسیدی تناؤ سے بچاتے ہیں، جو خلیات کو نقصان پہنچانے اور قبل از وقت بڑھاپے کا باعث بنتا ہے۔ ماہرین کا کہنا ہے کہ بادام کا استعمال صحت کے لیے بہت مفید ہے، تاہم اعتدال میں رہنا ضروری ہے کیونکہ زیادہ مقدار میں بادام کھانے سے وزن بڑھ سکتا ہے۔

یہ مضمون طبی جریدوں میں شائع تحقیق کی بنیاد پر تیار کیا گیا ہے، اور قارئین کو مشورہ دیا جاتا ہے کہ وہ اپنے معالج سے بھی مشورہ کریں۔