شوگر کے علاج کیلئے انقلابی دوا دریافت

امریکا میں ہونے والی ایک نئی سائنسی تحقیق نے شوگر کے مریضوں کے لیے امید کی نئی راہ دکھا دی ہے۔

نیویارک یونیورسٹی لینگون ہیلتھ کے ماہرین نے ایک ایسی دوا دریافت کی ہے جو شوگر کے خطرناک اثرات کو کم کرنے میں مدد دے سکتی ہے۔ ماہرین کے مطابق یہ دریافت مستقبل میں لاکھوں مریضوں کے علاج میں اہم کردار ادا کر سکتی ہے۔

تحقیق کے دوران یہ دوا چوہوں پر آزمائی گئی۔ اس دوا کو RAGE406R کا نام دیا گیا ہے۔ نتائج کے مطابق دوا نے جسم میں سوزش کم کی۔ خلیات کو پہنچنے والے نقصان کو محدود کیا۔ دل اور گردوں کی صحت بہتر بنانے میں بھی مثبت اثرات دیکھے گئے۔

تحقیق میں یہ بات بھی سامنے آئی کہ یہ دوا زخموں کے جلد بھرنے میں مدد دیتی ہے۔ شوگر کے مریضوں میں زخم دیر سے بھرنا ایک عام اور سنگین مسئلہ ہے۔ اس دوا سے زخم بھرنے کا عمل تیز ہوا، جو ایک بڑی پیش رفت سمجھی جا رہی ہے۔

ماہرین کا کہنا ہے کہ یہ دوا عام شوگر کی ادویات سے مختلف طریقے سے کام کرتی ہے۔ یہ خون میں شکر کی مقدار کم نہیں کرتی۔ بلکہ خلیات کے اندر ہونے والے نقصان کو روکنے پر توجہ دیتی ہے۔ دوا دو نقصان دہ پروٹینز، ریج اور ڈی آئی اے پی ایچ ون، کے باہمی عمل کو روک دیتی ہے۔

تحقیق کے مطابق شوگر میں ایڈوانسڈ گلائیکیشن اینڈ پروڈکٹس کی مقدار بڑھ جاتی ہے۔ یہ اجزاء شکر کے پروٹین یا چکنائی کے ساتھ جڑنے سے بنتے ہیں۔ جب یہ ریج پروٹین کے ساتھ ملتے ہیں تو جسم میں سوزش اور خلیاتی نقصان بڑھ جاتا ہے۔ ڈی آئی اے پی ایچ ون اس عمل میں اہم کردار ادا کرتا ہے۔ نئی دوا اسی نقصان دہ عمل کو روکنے میں مدد دیتی ہے۔

ماہرین نے بتایا کہ چوہوں کی جلد پر دوا لگانے سے زخم تیزی سے بھرے۔ اس سے یہ امید پیدا ہوئی ہے کہ مستقبل میں یہ دوا شوگر کے مریضوں میں دیر سے بھرنے والے زخموں کے علاج کے لیے استعمال کی جا سکتی ہے۔

یہ تحقیق معروف سائنسی جریدے سیل کیمیکل بایولوجی میں شائع ہوئی ہے۔ اگرچہ تحقیق ابھی ابتدائی مرحلے میں ہے، تاہم اسے شوگر کے علاج میں ایک اہم پیش رفت قرار دیا جا رہا ہے۔ ماہرین کا کہنا ہے کہ اگر انسانی تجربات میں بھی یہ دوا کامیاب رہی تو ٹائپ ون اور ٹائپ ٹو شوگر کے مریضوں کے لیے ایک نئی امید بن سکتی ہے۔