فالج کے مریضوں کیلئے اہم پیشرفت، سائنسدانوں نے بڑی خوشخبری سنادی

برطانیہ کی یونیورسٹی آف کیمبرج نے فالج اور دیگر نیورولوجیکل مسائل کے شکار مریضوں کے لیے ایک جدید اے آئی کالر ڈیوائس متعارف کروائی ہے۔ اس ڈیوائس کا نام “ری وائس” رکھا گیا ہے اور یہ مریض کے گلے کے سگنلز کو قدرتی اور روان آواز میں تبدیل کرنے کی صلاحیت رکھتی ہے۔

تحقیق کے مطابق یہ ڈیوائس مریض کے گلے میں پہنائی جاتی ہے اور دل کی دھڑکن سمیت دیگر جسمانی سگنلز کے ساتھ اسپیچ سگنلز حاصل کرتی ہے۔ بعد ازاں، مصنوعی ذہانت کی مدد سے ان سگنلز کو ڈی کوڈ کیا جاتا ہے، جس سے مریض کے سوچے گئے الفاظ اور جملے فصیح اور روان انداز میں بولے جا سکتے ہیں۔

مطالعے میں ری وائس ڈیوائس نے الفاظ کی درستگی میں تقریباً 96 فیصد اور جملوں کی درستگی میں 97 فیصد حاصل کی ہے۔ یہ کامیابی فالج یا دیگر نیورولوجیکل مسائل کے شکار افراد کے لیے ایک اہم سنگِ میل ہے۔ مزید یہ کہ ڈیوائس مریض کے جذبات اور بولے بغیر کیے گئے الفاظ کو بھی پہچان سکتی ہے اور انہیں مکمل جملوں میں تبدیل کر سکتی ہے، جس سے مریض روزمرہ گفتگو میں اعتماد کے ساتھ حصہ لے سکتا ہے۔

سائنسدانوں کا کہنا ہے کہ یہ ٹیکنالوجی نہ صرف فالج کے مریضوں کے لیے مددگار ہوگی بلکہ مستقبل میں پارکنسنز اور دیگر نیورولوجیکل بیماریوں میں بھی استعمال کی جا سکتی ہے۔ ری وائس ڈیوائس نہ صرف آرام دہ اور سادہ ہے بلکہ روزمرہ زندگی میں استعمال کے لیے بھی موزوں ہے۔ اس سے مریض اپنی سماجی اور پیشہ ورانہ زندگی میں دوبارہ مؤثر انداز میں شامل ہو سکتے ہیں۔