کوکنگ آئل میں پکا کھانا صحت کیلئے کتنا خطرناک ہے؟ ماہرین نے خطرے کی گھنٹی بجادی

ہمارے معاشرے میں کھانے پکانے میں کوکنگ آئل کا استعمال عام ہے۔ سبزی ہو یا گوشت، فرائی ہو یا بھونائی، کھانے کے ذائقے اور خوشبو کے لیے تیل ضروری سمجھا جاتا ہے۔

تاہم ماہرین صحت خبردار کرتے ہیں کہ ضرورت سے زیادہ تیل استعمال کرنا دل اور مجموعی صحت کے لیے خطرناک ہو سکتا ہے۔ زیادہ تیل کھانے سے جسم میں خراب کولیسٹرول بڑھتا ہے، جس سے دل کی شریانیں بند ہو سکتی ہیں اور فالج یا ہارٹ اٹیک کا خطرہ بڑھ جاتا ہے۔

ماہرین کے مطابق روزانہ تیل کی مقدار عمر، وزن اور جسمانی سرگرمی پر منحصر ہے۔ ایک صحت مند فرد کے لیے روزانہ تقریباً دو کھانے کے چمچ (25 سے 30 ملی لیٹر) تیل کافی ہے، اور ہفتہ وار مقدار تقریباً 150 سے 170 ملی لیٹر ہونی چاہیے۔ یہ صرف کھانے پکانے کے لیے استعمال ہونے والے کوکنگ آئل کے لیے ہے، تلی ہوئی اشیاء اور پراسیسڈ فوڈ میں پہلے ہی چکنائی زیادہ ہوتی ہے۔

تیل کی زیادتی سے موٹاپا، پیٹ کی چربی، ہائی بلڈ پریشر اور ذیابیطس کے خطرات بھی بڑھ جاتے ہیں۔ ایک بار چربی جمع ہو جائے تو اسے کم کرنا مشکل ہوتا ہے۔

دل کی صحت کے لیے بہتر سمجھا جانے والا تیل زیتون کا تیل، سرسوں کا تیل، مونگ پھلی کا تیل، سورج مکھی کا تیل اور سویا بین کا تیل ہے۔ ان میں موجود مونو سیچوریٹڈ فیٹس اور اومیگا تھری فیٹی ایسڈ دل کے لیے مفید ہیں۔ ماہرین کولڈ پریسڈ آئل استعمال کرنے اور ٹرانس فیٹس والے تیل سے بچنے کا مشورہ دیتے ہیں۔

گھی مکمل طور پر ترک کرنا ضروری نہیں، لیکن اسے محدود مقدار میں اور کبھی کبھار استعمال کریں۔ تیل کا متوازن اور احتیاطی استعمال صحت مند دل اور بہتر مجموعی صحت کے لیے ضروری ہے۔