خون کی گردش میں خرابی کو معمولی مت سمجھیں ورنہ !!! ماہرین نے خبردار کردیا

ماہرین صحت کے مطابق جسم میں خون کی روانی نہایت اہم ہے کیونکہ یہی خون آکسیجن اور غذائی اجزاء کو جسم کے ہر حصے تک پہنچاتا ہے۔ اگر خون کی گردش متاثر ہو جائے تو اعضاء اپنی کارکردگی کھو سکتے ہیں اور سنگین پیچیدگیاں پیدا ہو سکتی ہیں۔

طویل عرصے تک بیٹھے رہنا یا جسمانی سرگرمی میں کمی خون کے بہاؤ کو سست کر دیتی ہے۔ اس سے ٹانگوں کے پٹھے کمزور پڑ سکتے ہیں اور خون کے لوتھڑے بننے کا خطرہ بڑھ جاتا ہے۔ انسانی جسم ایک مربوط نظام کی طرح کام کرتا ہے اور ہر عضو کو مناسب مقدار میں آکسیجن اور غذائی اجزاء کی ضرورت ہوتی ہے، جو خون فراہم کرتا ہے۔ جب یہ نظام متاثر ہوتا ہے تو جسم مختلف علامات کے ذریعے خبردار کرتا ہے۔

خون کی گردش خراب ہونے کی نمایاں علامات

درد یا کمزوری: چہل قدمی، سیڑھیاں چڑھتے وقت یا کسی جسمانی مشقت کے دوران ٹانگوں میں درد ہونا خطرے کی علامت ہے۔ پنڈلیوں میں بھاری پن یا بے حسی بھی دوران خون کی خرابی کی نشاندہی کرتی ہے۔

جھنجھناہٹ: انگلیوں یا جسم کے کسی حصے میں سوئیاں چبھنے جیسا احساس خون کی ناقص گردش کی نشانی ہو سکتا ہے۔

ٹھنڈے ہاتھ پاؤں: اگر موسم کی پروا کیے بغیر ہاتھ یا پاؤں ہمیشہ ٹھنڈے رہیں تو یہ دوران خون کے مسئلے کی طرف اشارہ ہے۔

سوجن: پاؤں، ٹخنوں یا ہاتھوں میں غیر معمولی سوجن خون کے بہاؤ میں رکاوٹ کی وجہ سے ہو سکتی ہے۔

خون کی گردش خراب ہونے کی ممکنہ وجوہات

شریانوں میں رکاوٹ یا خون کے لوتھڑے، دل کی بیماری جس سے خون پمپ کرنے کی صلاحیت متاثر ہو، موٹاپا، بڑھتا ہوا وزن اور عمر کے ساتھ شریانوں کی سختی خون کی روانی میں رکاوٹ ڈال سکتی ہیں۔

خون کی گردش بہتر بنانے کے آسان طریقے

باقاعدہ ورزش: روزانہ کم از کم 30 منٹ چہل قدمی، سائیکلنگ یا تیراکی مفید ہے۔

متوازن غذا: پھل، سبزیاں، مچھلی اور گری دار میوے شریانوں کو صحت مند رکھتے ہیں۔

تناؤ میں کمی: مراقبہ اور گہری سانس لینے کی مشقیں مددگار ثابت ہوتی ہیں۔

پانی کا مناسب استعمال: خون کو گاڑھا ہونے سے بچاتا ہے۔

تمباکو نوشی سے پرہیز: شریانوں کو نقصان پہنچانے سے بچاتا ہے۔

مساج اور گرم غسل: خون کے بہاؤ کو تیز کرنے میں مدد دیتے ہیں۔

صحیح عادات اپنانے سے نہ صرف دوران خون بہتر ہوتا ہے بلکہ جسمانی توانائی اور مجموعی صحت میں بھی اضافہ ہوتا ہے۔