ٹھنڈا یا گرم، صحت کیلئے کونسا پانی زیادہ بہتر ہوتا ہے؟ جانیے

ماہرین صحت کے مطابق پانی کا درجہ حرارت جسم پر مختلف اثرات مرتب کرتا ہے، مگر وزن کم کرنے کے لیے ٹھنڈا یا گرم پانی کافی نہیں۔

تحقیقات کے مطابق ٹھنڈا پانی پینے سے جسم کو اپنے درجہ حرارت کو برقرار رکھنے کے لیے توانائی خرچ کرنی پڑتی ہے۔ اس دوران جسمانی توانائی خرچ ہونے کی شرح تقریباً 2.9 فیصد بڑھ جاتی ہے، جبکہ کمرے کے درجہ حرارت والے پانی سے یہ اضافہ 2.3 فیصد ہوتا ہے۔ مگر یہ اضافہ وزن کم کرنے کے لیے کافی نہیں۔

ماہرین کا کہنا ہے کہ وزن کم کرنے کے لیے پانی کی مقدار زیادہ اہم ہے، نہ کہ اس کا درجہ حرارت۔ روزانہ تقریباً ڈیڑھ لیٹر اضافی پانی پینے سے 8 ہفتوں میں وزن میں نمایاں کمی دیکھی گئی ہے۔ اضافی پانی پینے سے کھانے کی اشتہا بھی کم ہوتی ہے، جس سے وزن کم کرنے میں مدد ملتی ہے۔

گرم پانی کے فوائد بھی قابلِ غور ہیں۔ تحقیق سے معلوم ہوا ہے کہ گرم پانی پینے سے معدے کے افعال بہتر ہوتے ہیں اور تیزابیت کم ہوتی ہے۔ اس کے علاوہ گرم مشروبات جیسے سیاہ چائے پینے سے ذہنی سکون اور جسمانی تناؤ میں کمی آتی ہے۔

ماہرین صحت نے یہ بھی بتایا کہ جسمانی اور ذہنی فائدہ حاصل کرنے کے لیے پانی کا مناسب استعمال ضروری ہے اور پانی کے درجہ حرارت پر زیادہ توجہ دینے کی ضرورت نہیں۔