نیب کو جڑ سے اکھاڑ کر پھینکنا چاہیے، کیسز دیکھ کر کوئی سرمایہ کاری نہیں کرتا : شاہد خاقان

اسلام آباد : سابق وزیر اعظم کا کہنا ہے کہ نیب ایک بھی سیاستدان کو نہیں پکڑ سکی، نیب کیسز دیکھ کر ملک میں کوئی سرمایہ کاری نہیں کرتا۔

سابق وزیراعظم شاہد خاقان عباسی نے احتساب عدالت کے باہر میڈیا سے گفتگو میں کہا کہ نیب قانون میں جعلی کیسز کو ختم کرنے کی گنجائش موجود ہے۔ نیب عدالتوں میں کیمرے لگا کر عوام کو سماعت دکھانی چاہیے۔

یہ بھی پڑھیں : توشہ خانہ کیس: عمران خان کیخلاف تحقیقات کا آغاز، نیب نے جواب جمع کرا دیا

انہوں نے کہا کہ نیب کیسز دیکھ کر ملک میں کوئی سرمایہ کاری نہیں کرتا۔ نیب کے تماشوں نے ملک کو تباہ کر دیا ہے۔ نیب گزشتہ سالوں میں ایک بھی سیاستدان کو نہیں پکڑ سکی۔

ان کا کہنا تھا کہ نیب کو جڑ سے اکھاڑ کر پھینکنا چاہیے، ورنہ نیب ملک کو جڑ سے اکھاڑ کر ختم کر دے گا۔ ملک میں سابقہ وزیراعظم کو انصاف نہیں ملے گا تو غریب کو کیسے ملے گا؟