9 مئی سانحہ، ٹاپ لیڈر شپ سے رابطوں کے ناقابل تردید ثبوت مل گئے، 628 کالیں ٹریس

لاہور : پولیس نے نگراں وزیر اعلیٰ کو بتایا ہے کہ ٹاپ لیڈر شپ سے ٹیلی فونک رابطے کے ناقابل تردید ثبوت سامنے آرہے ہیں۔

نگراں وزیر اعلیٰ پنجاب محسن نقوی کی زیر صدارت اعلیٰ سطح کا اجلاس وہا، جس میں 9 مئی کے واقعات میں ملوث شرپسندوں کے خلاف قانونی چارہ جوئی کے حوالے سے ہونے والی پیش رفت کا جائزہ لیا گیا۔

اجلاس میں دہشت گردی کے واقعات میں ملوث اصل ملزموں کی نشاندہی کرنے والے افراد کیلئے نقد انعامات کی منظوری دی گئی۔

اجلاس کے شرکاء نے آئی ایس آئی کے دفتر پر حملے کے نامزد ملزمان کی غیر قانونی سہولت کاری پر اظہار تشویش کیا اور دہشت گردوں کو غیر معمولی سہولت کاری دینے پر ایک جج کے خلاف آفیشنل ریفرنس بھیجنے کا فیصلہ کرلیا۔ نامزد ملزموں کی غیر قانونی اور غیر آئینی سہولت کاری کا فیصلہ چیلنج بھی کیا جائے گا۔

یہ بھی پڑھیں : سندھ ہائی کورٹ : پی ٹی آئی نے مئیر کے انتخاب روکنے کیلئے درخواست دائر کردی

اجلاس کے شرکاء کا کہنا ہے کہ نامزد ملزموں کی سہولت کاری انصاف کے قتل کے مترادف ہے۔ محسن نقوی نے شرپسندوں کے خلاف درج کیسز کی بھرپور پیروی کا حکم دیا۔ متعلقہ کمشنرز اور آرپی اوز کو پراسیکیوشن کے عمل کا جائزہ لینے کیلئے روزانہ خود میٹنگ کرنے کی ہدایت دی۔

نگراں وزیر اعلیٰ کا کہنا تھا کہ مفرور شرپسندوں کی جلد ازجلد گرفتاری یقینی بنائی جائے۔ آرمی تنصیبات اورعوامی اثاثوں پر حملہ کرنیوالے کسی رعایت کے مستحق نہیں۔ 9 مئی کا دن پاکستان کی تاریخ کا ایک سیاہ باب ہے، مذموم منصوبہ بندی کے تحت دہشت گردی کی گئی۔

بریفنگ نے بتایا کہ جیوفینسنگ، ہیومین انٹیلی جنس، سوشل میڈیا اور نادرا کے ذریعے ملزمان کی شناخت اور گرفتاریاں یقینی بنائی جارہی ہیں۔ ٹاپ لیڈر شپ سے ٹیلی فونک رابطے کے ناقابل تردید ثبوت سامنے آرہے ہیں۔ لاہور میں ٹاپ لیڈر شپ سے رابطے کی 628 کالیں ٹریس ہوچکی ہے۔