سانحہ نو پانچ : کور کمانڈر کی وردی کی بے حرمتی کرنے والے نے شرمناک اعتراف جرم کرلیا

لاہور : نو مئی کو کور کمانڈر کی وردی کی بے حرمتی کرنے والے پی ٹی آئی کارکن کا بیان سامنے آگیا۔ پی ٹی آئی کے سرغنہ نے شرمناک اور تہلکہ خیز اعتراف جرم کرلیا۔

احتجاج کی آڑ میں جان محمد نامی شر پسند نے کورکمانڈر ہاؤس پر حملہ کیا اور یونیفارم کی تضحیک کی۔ کور کمانڈر کی وردی پہن کر غنڈہ گردی کرنے والے پی ٹی آئی کے شر پسند جان محمد کا تعلق ضلع مہمند سے ہے، جس نے بتایا کہ میں زمان پارک میں لگائے گئے مختلف علاقوں کے کیمپس میں مہمند باجوڑ کیمپ کا حصہ تھا۔ ہمارا کام عمران خان کو گرفتاری سے بچانا تھا۔

شرپسند نے کہا کہ عمران خان نے زمان پارک میں لگائے گئے مختلف علاقوں کے کیمپوں میں موجود کارکنان کے ساتھ میٹنگ کی اور منصوبہ بندی کی کہ اگر مجھے گرفتار کریں تو آپ لوگوں نے یہ یہ کرنا ہے۔ جب عمران خان گرفتار ہوئے تو شیخ امتیاز نے تمام کارکنان کو کینٹ کی طرف مارچ کرنے کو کہا۔

یہ بھی پڑھیں : کراچی سے گرفتار ملزمان کے سنسنی خیز انکشافات، 500 سے زائدوارداتوں کا اعتراف

جان محمد کا کہنا تھا کہ پی ٹی آئی کی لیڈر شپ بشمول اعجاز چوہدری، یاسمین راشد، میاں محمدالرشید، میاں اسلم اقبال اور دوسرے رہنما موجود تھے۔ یاسمین راشد اور اعجاز چوہدری نے ہمیں کور کمانڈر ہاؤس کے گھر کی جانب جانے کا کہا۔

شرپسند نے کہا کہ کور کمانڈر ہاؤس میں توڑ پھوڑ کے دوران مجھے یونیفارم ملتا ہے، جسے میں نے پہن کر ویڈیو بنائی۔ حسان نیازی نے پینٹ پکڑ لی، میں نے وُہ یونیفارم کی شرٹ بعد میں جلا دی۔ اُس کے بعد یہی گروپ پی ایس آو پیٹرول پمپ اور آرمی اسٹور میں گھس کر لوٹ مار کرتا رہا۔