ایم پی او کے تحت گرفتاری کالعدم، اسد عمر کو رہا کرنے کا حکم

اسلام آباد : اسلام آباد ہائی کورٹ نے اسد عمر کی ایم پی او کے تحت گرفتاری کالعدم قرار دیتے ہوئے انہیں رہا کرنے کا حکم دے دیا۔

اسلام آباد ہائی کورٹ میں اسد عمر کے کیسز کی تفصیلات فراہمی اور گرفتاری کے خلاف کیس کی سماعت جسٹس میاں گل حسن اورنگزیب نے کی۔

اسد عمر کے وکیل بابر اعوان عدالت میں پیش ہوئے اور استدعا کی کہ عدالت اسد عمر کو اس عدالت میں پیش کرنے کا حکم دے۔ جسٹس میاں گل حسن اورنگزیب نے کہا کہ اسد عمر کے خلاف کیسز میرے سامنے ہیں۔ اگر میں کوئی آرڈر کر دوں تو کل کیا ہوگا مجھے نہیں معلوم۔

وکیل کا کہنا تھا کہ ہم نے کیسوں کی تفصیلات فراہمی اور حفاظتی ضمانت کی درخواست دی تھی۔ ہم چاہتے ہمیں دو دن دے دیں تاکہ اگر، اگر رہائی ہو تو ہم متعقلہ عدالت میں سرینڈر کر دیں۔ جو کریمنل کیس درج ہیں، ہم ان میں حفاظتی ضمانت چاہتے ہیں۔

جسٹس میاں گل حسن اورنگزیب نے کہا کہ ہم نے شاہ محمود قریشی کو بھی بیان حلفی جمع کرانے کا کہا تھا۔ اس میں یہی تھا کہ 144 سیکشن کی خلاف ورزی نہ ہو۔ بابر اعوان نے کہا کہ اس سے قبل لوگ عدالتوں کو دھمکیاں دیتے رہے، احتجاج ہمارا حق ہے۔

یہ بھی پڑھیں : اسلام آباد ہائی کورٹ نے اسد عمر کے خلاف درج مقدمات کی تفصیلات کرلیں

معزز جج نے ریمارکس دیئے کہ وہ تو آپ کو نہیں چھوڑیں گے، جب تک آپ پریس کانفرنس نہیں کریں گے۔ بابر اعوان نے کہا کہ وہ تو ہم نہیں کریں گے۔

جسٹس میاں گل حسن اورنگزیب نے کہا کہ اسد عمر کے دو ٹویٹس ہیں وہ تو فوراً ڈیلیٹ کروائیں، جس پر بابر اعوان نے کہا کہ اگرچہ یہ خبر ہے، لیکن ہم آپ کے حکم کی تعمیل کریں گے۔

جسٹس میاں گل حسن اورنگزیب نے کہا کہ جس دو کیسوں میں ضمانت مانگ رہے ہیں، وہ فیصلہ محفوظ کر رہے ہیں۔ اسد عمر بیان حلفی جمع کروائیں۔ اگر بیان حلفی کی خلاف ورزی ہوئی تو سیاسی کیریئر پھر بھول جائیں۔ ٹویٹس بھی ڈیلیٹ کریں۔

عدالت نے تحریک انصاف کے رہنماء اسد عمر کو رہا کرنے کا حکم دے دیا۔