’ملک گیر احتجاج ہوگا‘، وزیراعظم کا 7 جولائی کو یوم تقدس قرآن منانے کا فیصلہ

اسلام آباد: وزیراعظم شہباز شریف کی زیر صدارت اہم اجلاس ہوا، اجلاس میں 7 جولائی کو یوم تقدس قرآن منانے کا فیصلہ کیا گیا ہے۔

ان کا کہنا تھا کہ جمعہ7 جولائی کو سوئیڈن واقعے کیخلاف ملک گیر احتجاج ہوگا، انہوں نے تمام جماعتوں، عوام کو احتجاج میں شرکت کی اپیل بھی کی، پوری قوم ایک زبان ہوکر شیطانی ذہنوں کو پیغام دے گی، جمعہ کو سوئیڈن واقعے کی مذمت میں ملک گیر احتجاجی ریلیاں نکالیں۔

وزیراعظم نے جمعرات کو پارلیمنٹ کا مشترکہ اجلاس بلانے کا بھی فیصلہ کیا ہے، ان کا کہنا تھا کہ مشترکہ اجلاس میں سوئیڈن واقعے پر قومی لائحہ عمل مرتب کیا جائے، پارلیمنٹ سے قوم کے جذبات، احساسات کی بھرپور ترجمانی کی جائے، پارلیمنٹ کے مشترکہ اجلاس میں مشترکہ قرارداد منظور کی جائے۔

یہ بھی پڑھیں: دہشت گردی کی تمام اقسام کی مذمت کی جانی چاہیئے: وزیراعظم

شہباز شریف نے ن لیگ کو بھی یوم تقدس قرآن میں بھرپور شرکت کی ہدایت کی ہے، انہوں نے کہا کہ قرآن کریم کی عزت و حرمت ہمارے ایمان کا حصہ ہے، قرآن کریم کی عزت و حرمت کیلئے ہم سب ایک ہیں، گمراہ ذہن اسلاموفوبیا کے منفی رحجان کوپھیلا کر مذموم ایجنڈے پر عمل پیرا ہیں، دنیا کی امن پسند اقوام اور قیادت اسلاموفوبیا کی شکار قوتوں کا راستہ روکیں، امن پسند اقوا مذہبی تعصبات کی حامل متشدد قوتوں کی حوصلہ شکنی کریں۔

ان کا کہنا تھا کہ مذہب، عقائد کونشانہ بنانے والے متشدد ذہن دنیا کے امن کیلئے خطرہ ہیں، بین المذاہب ہم آہنگی پر یقین رکھنے والی قومیں ایسے واقعات روکنے کیلئے کام کریں۔