سربراہ آئی ایم ایف کی انوار الحق کاکڑ سے ملاقات، امیروں سے مزید ٹیکس وصولی پر زور

عالمی مالیاتی فنڈ (آئی ایم ایف) کی سربراہ کرسٹالینا جارجیوا نے کہا ہے کہ ہم نے پاکستان سے یہ کہا ہے کہ امیروں سے مزید ٹیکس لیے جائیں اور غریبوں کو تحفظ فراہم کیا جائے۔

نیویارک میں نگراں وزیراعظم انوارالحق کاکڑ سے ملاقات کے بعد آئی ایم ایف کی منیجنگ ڈائریکٹر کرسٹالینا جارجیوا نے نجی نیوز چینل سے گفتگو کرتے ہوئے کہا کہ یہی وہ بات ہے جو پاکستان کے عوام بھی چاہتے ہیں۔

نگراں وزیراعظم انوارالحق کاکڑ نے سربراہ آئی ایم ایف سے ملاقات کو تعمیری قراردیتے ہوئے کہا کہ کرسٹالینا جارجیوا سے ملاقات میں معاشی تعاون اور استحکام کیلئے کوششوں پر تبادلہ خیال کیا گیا۔

انہوں نے کہا کہ ملاقات میں دونوں طرف سے اقتصادی ترقی اور استحکام کیلئے اقدامات کے عزم کا اعادہ کیا گیا۔

دوسری جانب نگراں وزیراعظم انوارالحق کاکڑ سے نیو یارک میں بل اینڈ ملینڈا گیٹس کے شریک چیئرمین بل گیٹس کی ملاقات ہوئی۔

ملاقات میں دونوں رہنماؤں نے پاکستان سے پولیو کے خاتمے، صنفی مساوات اور بچوں کی نشوونما سے متعلق امور پر تبادلہ خیال کیا۔

اس موقع پر نگراں وزیر اعظم نے کہا کہ نگراں حکومت اور قومی پولیو ٹاسک فورس ملک بھر سے پولیو کے خاتمے کیلئے پرعزم ہے، انہوں نے امید ظاہر کی کہ جلد ملک کے ہر علاقے سے پولیو کا خاتمہ ممکن ہو جائے گا۔

انہوں نے کہاکہ پاکستان بھر سے پولیو وائرس کی منتقلی کی روک تھام کیلئے پرعزم ہیں، حفاظتی ٹیکے اور صحت کی دیگر ضروری خدمات لوگوں کو فراہم کی جا رہی ہیں۔

ملاقات میں بل گیٹس نے کہا کہ پاکستان سے پولیو کا مکمل خاتمہ ہماری اولین ترجیح ہے۔

یہ پڑھیں : چین اور امریکا سے اپنے تعلقات کو انتہائی اہمیت دیتے ہیں :نگراں وزیرخارجہ