صحافی کی حیثیت سے لندن گیا تھا اس کا سیاست سے کوئی تعلق نہیں: مرتضیٰ سولنگی

کراچی: مرتضیٰ سولنگی کا کہنا ہے کہ پاکستان کے اسرائیل کے ساتھ سفارتی تعلقات نہیں، صحافی کی حیثیت سے لندن گیا تھا اس کا سیاست سے کوئی تعلق نہیں۔

نگراں وفاقی وزیر اطلاعات مرتضیٰ سولنگی کا جی ٹی وی نیوز کے پروگرام ’جائزہ‘ میں گفتگو کرتے ہوئے کہنا تھا کہ مشکلات ہر دور میں ہوتی ہیں، کسی بھی حکومت کے لیے مشکلات بہانہ نہیں ہونا چاہیے، ہمیں جن حالات میں ملک ملا، ہم پر کسی نے زبردستی نہیں کی، ہم نے یہ ذمے داری رضاکارانہ طور پر قبول کی۔

مرتضیٰ سولنگی کا کہنا تھا کہ آئی ایم ایف معاہدہ پچھلی سے پچھلی حکومت نے کیا، آئی ایم ایف کی شرائط کافی سخت ہیں، آئی ایم ایف کی شرائط مہنگائی اور مشکلات کی شکل میں دیکھ رہے ہیں، پاکستان اگر ڈیفالٹ ہوجاتا تو حالات اس سے بھی زیادہ خراب ہوتے، مشکلات کے باوجود ہماری کوشش ہے حالات بہتر کریں، انتظامی کنٹرول کے ذریعے ڈالر کی اونچی اڑان کو روکا، بجلی چوری اور نادہندہ سے 8 ارب کے قریب وصول کیے گئے، پیٹرول اسمگلنگ، چینی ذخیرہ اندوزوں کے خلاف سخت کارروائیاں کیں۔

ان کا کہنا تھا کہ گزشتہ حکومتوں پر کوئی تبصرہ نہیں کروں گا، ہم وہ سب کچھ کریں گے جس کی آئین و قانون اجازت دیتا ہے، ہم ایمانداری سے ملک کی بہتری کے لیے کام کریں گے، پوری دنیا میں بھارت کے خلاف آوازیں اٹھ رہی ہیں، ہمیں بہت زیادہ چیخ و پکار کرنے کی ضرورت نہیں ہے، سی پیک سے متعلق بہت جلد اچھی خبر ملے گی، مذاکرات جاری ہیں، اگلے مرحلے میں کام بہت تیزی سے ہوگا، بہت جلد چین کے دورے پر جارہا ہوں۔

انہوں نے کہا کہ دنیا کے کچھ اسلامی ممالک کے اسرائیل کے ساتھ سفارتی تعلقات ہیں، پاکستان کے اسرائیل کے ساتھ سفارتی تعلقات نہیں، پاکستانی پاسپورٹ پر بھی لکھا ہے اسرائیل کے علاوہ باقی تمام ممالک کیلئے قابل استعمال ہے، پاکستان کا مؤقف اسرائیل کے حوالے سے فلسطینیوں کے مستقبل سے جڑا ہے، پاکستان اپنے مؤقف پر قائم ہے، کوئی ملک اسرائیل سے تعلق رکھتا ہے تو وہ ان کا اپنا معاملہ ہے۔

مرتضیٰ سولنگی کا کہنا تھا کہ 5 اگست 2019 سے پاکستان کے بھارت سے تعلقات معمول پر نہیں ہیں، یہ مذہب کا نہیں انسانی حقوق کا معاملہ ہے، افغان سرزمین سے پاکستان پر حملے ہوتے ہیں، کالعدم ٹی ٹی پی اور داعش پاکستان کے خلاف سرگرمیوں میں مصروف ہیں، دہشت گرد گروہ افغان سرزمین کو استعمال کررہے ہیں، ہمارا ملک سیکیورٹی فورسز کے پاس ہے، پوری طاقت استعمال کریں گے،ہمارے پاس صلاحیت موجود ہے کہ ان کے خلاف کارروائیاں کریں۔

نگراں وفاقی وزیر اطلاعات کا کہنا تھا کہ ایک ایسے انجکشن کا انکشاف ہوا جس سے نقصان ہورہا ہے، تمام ملوث لوگوں کے خلاف قانون کے مطابق کارروائی ہوگی۔

یہ بھی پڑھیں: نوازشریف باہر ملک جیل کی دیواریں توڑ کر نہیں آئین کے مطابق گئے تھے:مرتضیٰ سولنگی

انہوں نے کہا کہ کچے کے ڈاکوؤں کا معاملہ بہت پرانا ہے، ریاست سے زیادہ طاقتور کوئی نہیں ہے، الیکشن کرانا نگراں حکومت کا نہیں الیکشن کمیشن کا کام ہے، ہم چاہتے ہیں ملک میں الیکشن کا سازگار ماحول ہو، الیکشن کمیشن نے مختلف سیاسی جماعتوں کے قائدین سے ملاقات کی، صحافی کی حیثیت سے لندن گیا تھا اس کا سیاست سے کوئی تعلق نہیں۔

ان کا کہنا تھا کہ 9 مئی کے واقعات میں جو لوگ ملوث تھے وہ لوگ قانون کی گرفت میں ہیں، 9 مئی کے واقعات میں ملوث کچھ لوگ بھاگے ہوئے ہیں، تمام سیاسی جماعتوں کے برابر کے مواقع فراہم کرنا ہماری آئینی ذمے داری ہے، ہماری پاس نواز شریف کی واپسی سے متعلق کوئی اطلاع نہیں، صرف ٹی وی میں دیکھا ہے، یہ نواز شریف کا ملک ہے جب چاہیں آسکتے ہیں۔