وزیر اعظم شہباز شریف کا امریکی صدر کو خط کا جواب

وزیراعظم شہبازشریف نے امریکی صدر جوبائیڈن کے خط کا جواب دیتے ہوئے لکھا کہ پاکستان امریکا کےساتھ تعلقات کو کلیدی اہمیت دیتا ہے۔

وزیر اعظم شہباز شریف نے امریکی صدر کو خط میں لکھا کہ توانائی ،موسمیاتی تبدیلی ،زراعت ،صحت تعلیم میں ملکر کام کررہےہیں۔

انہوں نے لکھا کہ دونوں ممالک میں توانائی اورگرین الائنس اقدام میں تعاون خوش آئندہ ہے، امریکا کیساتھ عالمی امن وسلامتی ،خطے کی ترقی وخوشحالی کیلئے کام کرنے کے خواہاں ہیں۔

مزید پڑھیں:

پاک امریکا شراکت داری دنیا کی سلامتی کیلئے اہم ہے، امریکی صدر کا وزیراعظم کو خط

شہباز شریف کے وزارت عظمیٰ کا منصب سنبھالنے کے بعد امریکی صدر جو بائیڈن کا یہ پہلا خط تھا جس میں جو بائیڈن نے نو منتخب پاکستانی حکومت کے لیے نیک تمناؤں کا اظہار کیا ہے۔

امریکی صدر نے خط میں لکھا کہ پاک امریکا شراکت داری دنیا اور عوام کی سلامتی یقینی بنانے میں اہم ہے، دنیا، خطے کو درپیش چیلنجز کا سامنا کرنے میں امریکا پاکستان کے ساتھ کھڑا ہے۔

جو بائیڈن نے کہا کہ پاکستان کے ساتھ ملکر انسانی حقوق کے تحفظ، ترقی کے فروغ کے لیے پر عزم ہیں، دونوں ممالک کے عوام کے درمیان استوار قریبی رشتے مزید مضبوط بنائیں گے۔

خط میں امریکی صدر نے لکھا کہ صحت عامہ کا تحفظ، معاشی ترقی اور سب کے لیے تعلیم مشترکہ وژن ہے جسے مل کر فروغ دیتے رہیں گے، امریکا پاکستان گرین الائنس فریم ورک سے ماحولیاتی بہتری کے لئے ہم اپنے اتحاد کو مزید مضبوط کریں گے۔

امریکی صدر جوبائیڈن نے کہا کہ پائیدار زرعی ترقی، آبی انتظام اور 2022ء کے سیلاب کے تباہ کن اثرات سے بحالی میں پاکستان کی معاونت جاری رکھیں گے، پاکستان کے ساتھ مل کر انسانی حقوق کے تحفظ اور ترقی کے فروغ کے لیے پرعزم ہیں۔

جو بائیڈن کا کہنا تھا کہ دونوں اقوام کے درمیان استوار مضبوط پارٹنرشپ کو تقویت دیں گے، دونوں ممالک کے عوام کے درمیان استوار قریبی رشتے مزید مضبوط بنائیں گے۔