ٹریفک پولیس حکام نے موٹر سائیکل اور کار سواروں کیلئے خوشخبری سنادی

میٹروپولیٹن شہر کراچی میں خریداری کے دوران گاڑی پارک کرنا کسی پریشانی سے کم نہیں، کیونکہ ٹریف پولیس کی جانب سے پورا شہر ‘نو پارکنگ زون’ بن گیا ہے۔

اگر آپ نے کبھی اپنی گاڑی چارج پارکنگ کے علاوہ کسی اور جگہ پارک کرنے کی ہمت کی تو آپ کو سائرن کا سامنا کرنا پڑے گا۔

ٹریفک پولیس کے لفٹرز کی ‘فوج’ چوکس رہتی ہے اور آپ کی گاڑی اٹھانے اور اسے چیک پوسٹ پر پھینکنے کا کوئی موقع ہاتھ سے جانے نہیں دیتی تاکہ ‘قانون کی خلاف ورزی’ پر آپ کو ‘سزا’ دی جا سکے۔

تاہم کراچی والوں کے لیے ٹریفک پولیس کی جانب سے ایک اچھی خبر ہے کیونکہ ڈی آئی جی احمد نواز چیمہ نے نو پارکنگ زون میں گاڑیوں کی پارکنگ پر عائد جرمانہ معاف کرنے کا اعلان کیا ہے۔

انہوں نے کہا کہ کراچی کے تمام شاپنگ سینٹرز کے باہر سے اٹھائی جانے والی موٹر سائیکلوں اور کاروں کے چارجز عید تک معاف کر دیے گئے ہیں۔

ڈی آئی جی نے کراچی کے شہریوں سے کہا کہ افطار کے بعد اٹھائی گئی ان کی گاڑیاں اور موٹر سائیکلیں بغیر جرمانے کے واپس کی جائیں گی۔

انہوں نے عوام سے بھی اپیل کی کہ وہ ایسی جگہوں پر پارکنگ سے گریز کریں جو ٹریفک کی روانی کو متاثر کرتی ہیں۔

ڈی آئی جی نے کہا کہ ٹریفک پولیس اہلکاروں کو غیر ضروری چالان جاری کرنے سے روک دیا گیا ہے اور حکام کو ون وے اور غلط طریقے سے خلاف ورزی پر چالان جاری کرنے کی ہدایت کی گئی ہے۔