بھارت نے پاکستان کیخلاف کوئی حرکت کی تو ادھار نہیں رکھیں گے، وزیر دفاع کا واضح پیغام

وفاقی وزیر دفاع خواجہ آصف نے بھارت کو واضح پیغام دیا ہے کہ پاکستان کیخلاف کوئی ایڈوینچر کیا تو منہ توڑ جواب دینگے۔

تفصیلات کے مطابق وزیر دفاع خواجہ آصف نے بھارتی وزیر دفاع راج ناتھ کے بیان پر ردعمل دیتے ہوئے کہا کہ بھارتی حکمران الیکشن میں چار ووٹ اکٹھے کرنے کیلئے بھڑکیں مار رہے ہیں، ان میں اتنی جرأت نہیں ہے،اگرکی تو خمیازہ بھگتنا پڑے گا۔

وزیر دفاع نے نجی چینل سے گفتگو کرتے ہوئے کہا کہ بھارت کی دہشت گردی کینیڈا اور امریکا بھی پہنچ چکی ہے، ہمارے خلاف بھارت نے کوئی حرکت کی تو کوئی ادھار نہیں رکھیں گے۔

انھوں نے بتایا کہ پلوامہ ڈرامہ تھا، اسکو بہانہ بنا کر پاکستان میں جو جارحیت کی اسکا منہ توڑ جواب دیا اور خیرات میں پائلٹ واپس کیا گیا۔

خواجہ آصف کا کہنا تھا کہ بھارت کی خواہشیں کچھ بھی ہوسکتی ہیں، بھارت کی دہشت گردی کی تاریخ پرانی ہے، مودی جب گجرات کے وزیراعلیٰ تھے تب بھی مسلمانوں کا قتل عام کیا، دہشت گردی کی وجہ سےمودی کا امریکی ویزہ منسوخ ہوا۔

خواجہ آصف کا مزید کہنا تھا کہ ہم خطرناک محل وقوع میں رہ رہے ہیں، بھارت اور افغانستان میں حالات سب کے سامنے ہیں، سب کو بتانا چاہتے ہیں نہ ماضی میں ادھاد رکھا نہ اب رکھیں گے۔

بھارتی وزیر دفاع  کا انٹرویو:

برطانوی اخبار دی گارجین کی رپورٹ کے مطابق بھارت کے وزیرِ دفاع راج ناتھ سنگھ نے پاکستان میں شہریوں کو قتل کرانے کا اعتراف کیا ہے

بھارت کے مطابق پاکستان میں جن لوگوں کو نشانہ بنایا گیا ان میں سے زیادہ تر سزاء یافتہ دہشت گرد اور عسکریت پسند گروپوں سے تھا۔ بھارت کے مطابق انہوں نے ہندوستان میں مہلک حملے کیے تھے۔

اس سے قبل بھارت نے ان ہلاکتوں میں ملوث ہونے سے انکار کیا تھا، لیکن دی گارجین کی رپورٹ کی اشاعت کے بعد بھارتی وزیر دفاع راج ناتھ سنگھ نے اس بات کی تصدیق کی ہے کہ بھارت نے پاکستان میں چھپے دہشت گردوں کو نشانہ بنایا ہے۔

بھارتی ٹی وی نیوز نیٹ ورک نیوز 18 کو دیے گئے ایک انٹرویو میں بھارتی وزیر دفاع راج سنگھ نے کہا کہ اگر پڑوسی ملک کا کوئی دہشت گرد ہندوستان کو پریشان کرنے یا یہاں دہشت گردانہ سرگرمیوں کو انجام دینے کی کوشش کرتا ہے تو اسے منہ توڑ جواب دیا جائے گا۔ اگر وہ پاکستان فرار ہو جاتا ہے تو ہم پاکستان جائیں گے اور وہاں اسے مار ڈالیں گے۔ دوسری جانب پاکستان نےبھارتی وزیر دفاع راج ناتھ سنگھ کے بیان کی سخت الفاظ میں مذمت کی ہے۔

بھارتی بیان پر دفترخارجہ کی شدید مذمت:

ترجمان دفتر خارجہ نے کہا کہ پاکستان نے 25 جنوری 2024 کو بھارت کے پاکستان میں دراندازی اور ماورائے عدالت قتل کے ناقابل تردید شواہد فراہم کیے، یہ پاکستان میں بھارت کے ماورائے عدالت اور بین الاقوامی قتل عام کی مہم کے واضح ثبوت ہیں۔

دفتر خارجہ کے ترجمان کا کہنا ہے کہ بھارت کا مزید شہریوں کو نشانہ بنانے کا دعویٰ واضح طور  پر جرم کا اعتراف ہے، عالمی برادری کو بھارت کے ان گھناؤنے اور غیر قانونی اقدامات پر محاسبہ کرنا چاہیے۔