شاہد خاقان کا نئی سیاسی جماعت کیلئے الیکشن کمیشن سے رجوع

مسلم لیگ (ن) کے سابق وزیراعظم شاہد خاقان عباسی نے نئی سیاسی جماعت کی رجسٹریشن کے لیے الیکشن کمیشن آف پاکستان سے رجوع کرلیا۔

جی ٹی وی کے مطابق شاہد خاقان عباسی نے سیاسی جماعتوں کی رجسٹریشن کے لیے الیکشن کمیشن میں معلومات جمع کروائیں۔

سابق وزیراعظم نے الیکشن کمیشن کو تمام ضروری دستاویزات فراہم کیں۔ انہوں نے کہا کہ الیکشن ایکٹ 2017 کے تحت سیاسی جماعت کو رجسٹر کیا جا رہا ہے۔

مسلم لیگ (ن) کے سابق رہنما آئندہ عام انتخابات نئی سیاسی جماعت کے تحت لڑیں گے۔

گزشتہ ماہ سابق وزیراعظم شاہد خاقان عباسی نے نئی سیاسی جماعت بنانے کا اعلان کرتے ہوئے زور دیا تھا کہ ہمیں ایک دوسرے کو کرپٹ کہنا بند کرنا ہوگا۔

شاہد خاقان عباسی نے موجودہ سیاسی صورتحال پر بات کرتے ہوئے کہا کہ سیاسی جماعتیں ملکی مسائل پر بات نہیں کر رہی ہیں۔ سابق وزیراعظم نے کہا کہ نئی پارٹی اس لیے بنا رہے ہیں کیونکہ دیگر سیاسی جماعتیں عوام کو درپیش مسائل کے حل کے لیے سنجیدہ نہیں ہیں۔

انہوں نے کہا کہ حالیہ انتخابات کے دوران بھی ان مسائل پر کوئی بات چیت نہیں ہوئی تھی۔

سابق وزیراعظم نے مزید کہا کہ سیاسی جماعتیں قومی مسائل پر بات کر رہی ہیں۔ ہم سب کو ایک دوسرے کو بدعنوان کہنا بند کرنا ہوگا۔

میڈیا سے گفتگو کرتے ہوئے ان کا کہنا تھا کہ 8 فروری کا الیکشن اتنا متنازع ہ الیکشن بن چکا ہے کہ اس سے ملک کو نقصان پہنچے گا کیونکہ جب لوگوں کا نظام پر سے اعتماد اٹھ جاتا ہے تو نقصان ہی ہوتا ہے۔