میٹروول سائٹ میں کار پر فائرنگ سے 2 افراد جاں بحق،وزیر اعلیٰ کا نوٹس

کراچی کے علاقے میٹروول سائٹ فاطمہ مسجد کے قریب کار پر فائرنگ سے 2 شہری جاں بحق ہوگئے، وزیراعلیٰ سندھ نے واقعے کا نوٹس لے لیا۔

جی ٹی وی کے مطابق واقعے کی اطلاع ملتے ہی پولیس جائے وقوعہ پر پہنچ گئی، واقعے سائٹ اے تھانہ کی حدود میں پیش آیا۔

 ڈی آئی جی ساؤتھ سید اسد رضا نے جائے وقوعہ پر میڈیا سے گفتگو کرتے ہوئے کہا کہ صبح نو بجے یہ افسوسناک وقوعہ پیش آیا، مقتولین پولٹری فارم کے ملازم ہیں جو کیش لیکر بینک جارہے تھے۔

انہوں نے کہا کہ ملزمان پہلے سے موجود تھے انہیں علم تھا کہ یہ افراد یہاں سے گزریں گے، مقتولین کی کار پر دونوں جانب سے فائرنگ کی گئی ہے

یہ معمول کا اسٹریٹ کرائم نہیں بلکہ ملزمان نے اپنی معلومات کی بنیاد پر دونوں افراد کو ٹارگٹ کرکے رقم لوٹ لی، نائین ایم ایم کے 5 خول جائے وقوع سے ملے ہیں مزید شواہد کرائم سین یونٹ جمع کررہی ہے

ڈی آئی جی ساؤتھ کا مزید کہنا تھا کہ اتنا زیادہ کیش بینک لے جاتے ہوئے پولیس کو پیشگی اطلاع دینی چاہئے تھی یا کم از کم پرائیویٹ سیکورٹی گارڈ موجود ہوتا، لیکن یہاں خستہ حال گاڑی میں بغیر کسی سیکورٹی کے اتنی بڑی رقم کو منتقل کیا جارہا تھا، ہم کیس سے جڑے تمام افراد کو شامل تفتیش کریں گے اور شواہد کی مدد سے ملزمان تک پہنچ جائیں گے۔

پولیس کے مطابق جاں بحق افراد کی شناخت شیر عالم اور ذاکر کے نام سے ہوئی، جاں بحق دونوں افراد پولٹری کمپنی کے ملازم تھے، جاں بحق شخص شیر عالم اکاؤنٹس کا کام کرتا تھا۔

پولیس کا بتانا ہے کہ جاں بحق افراد رقم بینک میں جمع کروانے جارہے تھے ، دونوں ملازمین سے ایک کروڑ 35 لاکھ روپے لوٹے گئے،ملزمان رقم لوٹ کر فرار ہوگئے۔

ایس ایس پی کیماڑی فیضان علی کے مطابق ابتدائی تحقیقات کے مطابق واقعہ ڈکیتی مزاحمت پر پیش آیا، سائٹ ایریا میں نامعلوم افراد نے کار پر فائرنگ کی ، جس کے نتیجے میں ایک شخص جاں بحق جبکہ زخمی ہونے والا شخص دوران علاج دم توڑ گیا جس کے بعد واقعہ میں جاں بحق افراد کی تعداد 2 ہوگئی۔

پولیس حکام نے بتایاکہ جاں بحق افراد پولٹری فارم کا کام کرتے تھے، گاڑی میں سوا کروڑ روپے لیکر بینک جارہے تھے، ممکنہ طور پر کسی نے ٹارگٹ کیا ہے اور رقم لیکر فرار ہوگئے۔

دوسری جانب وزیر اعلیٰ سندھ مراد علی شاہ نے آئی جی پولیس سے واقعے کی رپورٹ طلب کرلی، وزیر اعلیٰ سندھ نے کہا کہ قاتلوں کو فوری گرفتار کر کے رپورٹ دی جائے، اس قسم کے واقعے ناقابل قبول ہیں، علاقے کی پولیس کہاں تھی، پولیس گشت کو ایسی جگہوں پر بڑھایا جائے جہاں کرائم زیادہ ہے۔

وزیرداخلہ سندھ نے میٹروول میں ڈکیتی مزاحمت پر دو شہریوں کے قتل کا نوٹس لے کر ایس ایچ او سائٹ کو معطل کردیا، ایس ایس پی کیماڑی کو انکوائری کے احکامات دیتے ہوئے رپورٹ طلب کرلی ، ضیا الحسن لنجار نے کہا کہ ڈکیتی مزاحمت پر شہریوں کا قتل یا زخمی کرنے کے واقعات ناقابل برداشت ہیں ، جن ایس ایچ اوز کو فیلڈ میں جانے کے بجائے دفاتر میں بیٹھنے کا شوق ہے ان سے اہم ذمہ داریاں واپس لی جائیں۔