پاکستان کا مشرق وسطیٰ کی صورتحال پر گہری تشویش کا اظہار: دفتر خارجہ

پاکستان کی وزارت خارجہ نے ایران اسرائیل کشیدگی پر ردعمل کا اظہار کرتے ہوئے صورتحال پر گہری تشویش کا اظہار کیا ہے۔

ترجمان دفتر خارجہ ممتاز زہرہ بلوچ نے ایک بیان میں کہا ہے اسلام آباد مشرق وسطیٰ کی صورتحال کو گہری تشویش کی نظر سے دیکھ رہا ہے۔

ایک بیان میں ممتاز زہرہ بلوچ نے کہا کہ پاکستان کئی ماہ سے غزہ میں جنگ بندی پر زور دے رہا ہے تاکہ خطے میں دشمنی کو پھیلنے سے روکا جا سکے۔

انہوں نے مزید کہا کہ پاکستان نے شام میں ایرانی سفارت خانے پر حملے کے بعد کشیدگی میں اضافے کا اشارہ دیا ہے۔ آج کی صورتحال سفارتکاری میں تعطل کے نتائج کو ظاہر کرتی ہے۔

ترجمان دفتر خارجہ نے کہا کہ اب صورتحال میں استحکام اور امن کی بحالی کی اشد ضرورت ہے، پاکستان تمام فریقین پر زور دیتا ہے کہ وہ انتہائی صبر و تحمل سے کام لیں۔

خیال رہے کہ اتوار کی صبح ایران نے اسرائیل پر 200 سے زائد ڈرونز اور میزائلوں سے فضائی حملہ کیا تھا۔

سپاہ پاسداران انقلاب اسلامی کا کہنا ہے کہ یہ کارروائی ‘ٹرو پرومیس’ آپریشن کے تحت کی گئی ہے اور یہ اقدام ‘اسرائیلی جرائم’ کی سزا کا حصہ ہے۔

عالمی ذرائع ابلاغ کے مطابق اتوار کی علی الصبح یروشلم کے اوپر آسمان پر کئی مقامات پر سائرن بجنے لگے اور دھماکوں کی آوازیں سنی گئیں جبکہ ایران کے آلہ کاروں اور اتحادیوں نے اسرائیلی ٹھکانوں پر مربوط حملے کیے۔

اسرائیل کا کہنا ہے کہ ڈرونز کو اپنی فضائی حدود تک پہنچنے میں کئی گھنٹے لگیں گے۔

یہ حملہ شام میں ایرانی قونصل خانے پر اسرائیل کے حملے کے تقریبا دو ہفتے بعد ہوا ہے جس میں پاسداران انقلاب کے سات ارکان ہلاک ہو گئے تھے۔

پاسداران انقلاب نے ایک بیان میں کہا کہ ہم نے شام میں ایرانی قونصل خانے کو نشانہ بنانے کے صیہونی ادارے کے جرم کے جواب میں ڈرون اور میزائلوں کا استعمال کرتے ہوئے ایک آپریشن شروع کیا ہے۔

یہ آپریشن درجنوں میزائلوں اور ڈرونز کے ذریعے مقبوضہ علاقوں میں مخصوص اہداف کو نشانہ بنانے کے لیے کیا گیا۔