پاک سعودی تعلقات کو شراکت داری میں بدلنے کی ضرورت ہے، وزیر خارجہ

وزیر خارجہ اسحاق ڈار نے خصوصی سرمایہ کاری سہولت کونسل اجلاس سے خطاب کرتے ہوئے کہا کہ برادرانہ تعلقات کو مضبوط اقتصادی شراکت داری میں بدلنے کی ضرورت ہے۔

جی ٹی وی کے مطابق وزیر خارجہ اسحاق ڈار نے خطاب کرتے ہوئے کہا کہ پاکستان اور سعودی عرب کے تعلقات علاقائی امن و استحکام کیلئے اہم ہیں، ایس آئی ایف سی، پاک سعودی تعلقات مذہبی و ثقافتی اقدار پر مبنی ہیں، ہماری شراکت داری مشترکہ اہداف اور خوشحال مستقبل پر ہے۔

وزیر خارجہ کا کہنا تھا کہ پاکستان اور سعودی عرب کے درمیان شراکت داری انتہائی اہم ہے،ایس آئی ایف سی سے سرمایہ کاری اور تعاون بڑھانے میں مدد ملے گی۔

وزیر خارجہ نے اجلاس سے مزید کہا کہ زراعت، توانائی ، معدنیات میں تعاون کے بہترین مواقع موجود ہیں، آئی ٹی اور کان کنی کے شعبوں میں تعاون دونوں ممالک کیلئے مفید ہے، دونوں ممالک کے تعاون سے بہترین نتائج کی امید ہے، پاکستان میں سرمایہ کاری دونوں ممالک کے مستقبل کیلئے فائدہ مند ہے۔

واضح رہے کہ سعودی عرب کے وزیر خارجہ شہزادہ فیصل بن فرحان دو روزہ دورے پر پیر کی شام  پاکستان پہنچے تھے۔

قبل ازیں آج سعودی وزیر خارجہ سمیت اعلیٰ سطح وفد نے وزیر اعظم سمیت صدر مملکت سے ملاقاتیں کیں، ملاقات میں سرمایہ کاری، ماحولیات، آبی وسائل وزراعت، صنعت و معدنی مسائل کے وزراء شامل تھے۔

پاکستانی وزارت خارجہ کے مطابق ان کے اس دورے میں اقتصادی شراکت داری کو آگے بڑھانے پر توجہ رہے گی۔

قبل ازیں اسلام آباد کے نور خان ایئر بیس پہنچنے پر پاکستان کے وزیر خارجہ اسحاق ڈار نے سعودی عرب کے وزیر خارجہ شہزادہ فیصل بن فرحان کا استقبال کیا۔ اس موقع پر وہاں موجود بچوں نے سعودی وزیر خارجہ کو پھول پیش کیے۔