قطر سے انتہائی قریبی تعلقات ہیں، وفاقی وزیر داخلہ

وفاقی وزیر داخلہ محسن نقوی کا کہنا ہے کہ قطر سے انتہائی قریبی تعلقات ہیں۔

 وفاقی وزیر داخلہ محسن نقوی سے قطر کے سفیر علی مبارک علی عیسیٰ الحظیر نے ملاقات کی جس میں باہمی دلچسپی کے امور اور دوطرفہ تعاون بڑھانے پر تبادلہ خیال کیا گیا۔

 دوران ملاقات قطر میں قید پاکستانی شہریوں کی رہائی سے متعلق گفتگو کی گئی اور انسداد منشیات کے سلسلے میں باہمی اشتراک کار بڑھانے پر اتفاق کیا گیا۔

قطر کے سفیر نے و فاقی وزیر داخلہ محسن نقوی کو قطر کے دورے کی دعوت دی اور کہا کہ پاکستان برادر اسلامی ملک ہے، تعلقات کو انتہائی اہمیت دیتے ہیں۔

وفاقی وزیر داخلہ محسن نقوی نے کہا کہ قطر سے انتہائی قریبی تعلقات ہیں، جلد قطر کا دورہ کرکے ہم منصب سے ملاقات کروں گا۔