پاک افغان بارڈر پر خارجیوں کی دراندازی کی کوشش ناکام، 8 خوارج ہلاک،4زخمی، آئی ایس پی آر

پاک فوج نے افغان بارڈر پر خارجیوں کی دراندازی کی کوشش ناکام بناتے ہوئے 8 خوارج کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق 5 اور 6 اپریل کی درمیانی شب اندھیرے کا فائدہ اٹھاتے ہوئے خوارج کے ایک گروپ نے شمالی وزیرستان کے علاقے حسن خیل سے پاکستان میں داخلے کی کوشش کی۔

سیکیورٹی فورسز نے خوارج کی پیش قدمی کو روکتے ہوئے جوابی کارروائی کی جس کے دوران فائرنگ کے شدید تبادلے اور جھڑپ میں 8 خوارج ہلاک جبکہ چار زخمی ہوئے جنھیں گرفتار کرلیا گیا۔

آئی ایس پی آر نے کہا ہے کہ پاکستان متعدد بار دہشت گردوں کی دراندازی اور موجودگی کے حوالے سے افغان حکومت کو آگاہ اور مطالبہ کرچکا ہے کہ دہشت گرد گروپس کے خلاف کارروائی عمل میں لائی جائے۔

ترجمان پاک فوج نے کہا کہ افغان حکومت سے بارہا مطالبہ کیا کہ وہ بارڈر مینجمنٹ کو یقینی بنائے اور اپنی سرزمین پر موجود پاکستان مخالف دہشت گردوں کے خلاف کارروائی کرے۔

اعلامیے میں کہا گیا ہے کہ علاقے میں دیگر خوارج کی موجودگی کے پیش نظر آپریشن کلین اپ جاری ہے اور سیکیورٹی فورسز وطن عزیز سے دہشت گردی کے خاتمے اور سرحدوں کی حفاظت کیلیے چوکس و پرعزم ہیں۔

صدرملکت، وزیر اعظم اور وفاقی وزیر داخلہ کی سیکیورٹی فورسز کو شاباش:

صدرمملکت نے  پاک افغان سرحد پر دراندازی کی کوشش ناکام بنانے پر فورسز کوخراج تحسین پیش کیا ہے۔ صدر زرداری کا کہنا تھا مسلح افواج ملکی سرحدوں کی ہمہ وقت حفاظت کے لیے پرعزم ہے۔

وزیراعظم شہباز شریف نے افغان سرحد پر خوارج کی دراندازی کی کوشش ناکام بنانے پر فورسز کی پذیرائی کرتے ہوئے کہا ہےکہ سیکیورٹی فورسز نے خوارج کے شرانگیزی عزائم کو ناکام بنایا، مسلح افواج کسی بھی قسم کی شرانگیزی کی کوششوں کوناکام بنانے کیلئے مصروف عمل ہیں۔

وزیر داخلہ محسن نقوی نے کہا کہ سیکیورٹی فورسز نے ہمیشہ کی  طرح آج بھی بر وقت کارروائی کرکے  خوارجی دہشتگردوں کی شمالی وزیرستان میں دراندازی  کو ناکام بنایا، پاکستان کی بہادر سکیورٹی فورسز نے دراندازی کرنے والے 8 خوارجی دہشتگردوں کو عبرتناک انجام تک پہنچایا۔

انہوں نے کہا کہ خوارجی دہشتگردوں کے ناپاک عزائم خاک میں ملانے پر سیکیورٹی فورسز کو سلام پیش کرتے ہیں۔ وزیر داخلہ محسن نقوی نے سیکیورٹی فورسز کی پیشہ وارانہ صلاحیتوں کو بھی سراہا۔

اپنے بیان میں انہوں نے کہا کہ قوم دراندازی کرنے والے خوارجی دہشت گردوں کے خلاف  سکیورٹی فورسز کی کارروائی کو تحسین کی نگاہ سے دیکھتی اور اُن کی پیشہ وارانہ مہارت و جرات پر فخر کرتی ہے۔