پاکستان منرلز انویسٹمنٹ فورم 2025 ؛ وزیر اعظم اور آرمی چیف کی خصوصی شرکت

معدنی شعبے میں سرمایہ کاری کے فروغ کے لیے پاکستان منرلز انویسٹمنٹ فورم 2025 کا 8 تا 9 اپریل کو انعقاد ہوگا۔

وزیر اعظم شہباز شریف اور آرمی چیف جنرل سید عاصم منیر انویسٹمنٹ فورم میں شرکت کریں گے۔

شہباز شریف اورجنرل سید عاصم منیر پاکستان منرلز انویسٹمنٹ فورم سے خطاب بھی فرمائیں گے۔

اس کے علاوہ فورم میں اہم غیر ملکی شخصیات، وفاقی وزراء، سیکریٹریز، اعلیٰ سطحی ایگزیکٹوز اور نمایاں میڈیا شخصیات کی بھی شرکت متوقع ہے۔

اعلیٰ سطحی امریکی وفد ایرک مائر کی سربراہی میں انویسٹمنٹ فورم میں شرکت کرے گا، غیر ملکی  سرمایہ کار پہلے ہی پاکستان پہنچنا شروع ہو چکے ہیں۔

ایشین ڈویلپمنٹ بینک کی ڈپٹی ڈائریکٹر اور چین جیولوجیکل سروے کا وفد پہلے ہی اسلام آباد پہنچ چکا ہے۔

حکومت اور ایس آئی ایف سی کی مشترکہ کاوشوں سے معدنی وسائل سے بھرپور فائدہ اٹھانے کا اہم موقع ہے۔

فورم میں عالمی سرمایہ کاروں کی بھرپور شرکت سے معدنیات کے شعبے میں ترقی کے نئے امکانات ہیں، معدنیات کے شعبے میں جدید ٹیکنالوجی کے موثر استعمال پر تبادلہ خیال کے لیے بین الاقوامی ماہرین شرکت کریں گے۔

ریکوڈک سمیت اہم معدنی منصوبوں میں سرمایہ کاری، سیکیورٹی اور حکومتی پالیسیوں پر اہم سیشنز، سرمایہ کاروں کے لیے پرکشش مواقع ہیں۔

معدنی شعبے کے لیے ترقیاتی منصوبے زیر غور آئیں گے جبکہ معدنی ذخائر کو پائیدار ترقی کے لیے بروئے کار لانے پر بھی توجہ دی جائے گی۔

پاکستان کو معدنی وسائل میں سرمایہ کاری کے لیے خطے کا نیا تجارتی اور معاشی مرکز قرار دیدیا گیا ہے۔

ایس آئی ایف سی کی معاونت سے اس فورم کے انعقاد کے ذریعے حکومت معدنیات کے شعبے کی ترقی سے معاشی استحکام کے لیے کوشاں ہے۔