پاکستان کا نئے ٹیرف پر اعلیٰ سطح وفد امریکا بھیجنے کا فیصلہ

اسلام آباد: پاکستان نے نئے امریکی ٹیرف سے متعلق مذاکرات کیلئے اعلیٰ سطح وفد امریکا بھیجنے کا فیصلہ کر لیا۔

وزیراعظم شہباز شریف کی زیرِ صدارت نئے امریکی نئے پر جائزہ اجلاس ہوا جس میں نائب وزیر اعظم و وزیر خارجہ اسحاق ڈار، وفاقی وزرا احد خان چیمہ، محمد اورنگزیب ، پرویز ملک، مشیر وزیرِاعظم سید توقیر شاہ، طارق فاطمی اور ہارون اختر شریک ہوئے۔

اعلامیے کے مطابق اجلاس میں فیصلہ کیا گیا کہ پاکستان سے وفد امریکا جائے گا، وفد امریکا کے ساتھ تجارتی تعلقات کے فروغ اور نئے ٹیرف پر بات کرے گا جب کہ وزیر اعظم کی ہدایت پر وفد میں معروف کاروباری شخصیات اور برآمد کنندگان بھی شامل ہوں گے۔

مزید پڑھیں:امریکا کا پاکستان کیلئے گلوبل انڈرگریجویٹ ایکسچینج پروگرام ختم

اجلاس میں وزیر اعظم کو بتایا گیا کہ امریکا میں پاکستانی سفارتخانہ مسلسل امریکی حکومت کے ساتھ رابطے میں ہے۔ اس موقع پر شہباز شریف نے کہا کہ امریکا پاکستان کے تجارتی تعلقات دہائیوں پر محیط ہیں، حکومت امریکا کے ساتھ تجارتی شراکت داری کو مزید مضبوط بنانے کی خواہاں ہے۔

اعلامیے میں کہا گیا کہ وزیراعظم نے وفد کو نئےٹیرف پر مذاکرات کے بعد لائحہ عمل طے کرنےکا ٹاسک سونپ دیا ہے۔ اس کے علاوہ وزیراعظم کو نئے ٹیرف پر اسٹیئرنگ کمیٹی اور ورکنگ گروپ کی رپورٹ پیش کی گئی اور مستقبل کا مجوزہ لائحہ عمل پیش کیا گیا۔