پاکستان دنیا بھر میں بیرون ملک اوور سیز کے حوالے سے 7 ویں نمبر پر آگیا

اسلام آباد: بیرون ملک مقیم پاکستانی ترسیلات زر کے ذریعے ملکی معیشت میں بہتری کے لیے ریڑھ کی ہڈی کا کردار ادا کررہے ہیں۔

اقوام متحدہ کے محکمہ برائے اقتصادی و سماجی امور کے مطابق دنیا بھرمیں تقریباً 272 ملین بیرونِ ملک مقیم افراد رہتے ہیں ان میں سے پاکستان دنیا کا ساتواں بڑا بیرونِ ملک مقیم پاکستانیوں کا حامل ملک ہے۔

یہ افراد ملک کی ساکھ، معیشت، اور سفارت کاری پر گہرا اثر ڈالتے ہیں۔

پاکستانی بیرونِ ملک مقیم افراد ملک کی معیشت اور ترقی کے لیے ایک اہم ذریعہ آمدن ہیں۔

پیو ریسرچ سینٹر کے ایک سروے کے مطابق بیرون ملک مقیم 53 فیصد پاکستانیوں کا کہنا ہے کہ ان کی موجودگی میزبان ممالک میں پاکستان کے تاثر کو مثبت انداز میں پیش کرتی ہے۔

ورلڈ بینک کے مطابق پاکستان دنیا کے ان 10 ممالک میں شامل ہے جو سب سے زیادہ ترسیلات زر وصول کرتے ہیں یہی ترسیلات زر جی ڈی پی کا اہم حصہ ہیں۔

اسٹیٹ بینک آف پاکستان کے تازہ اعداد و شمار کے مطابق پاکستان کو سب سے زیادہ ترسیلات خلیجی ممالک، امریکا، برطانیہ اور شمالی آئرلینڈ سے موصول ہوئیں۔

مالی سال 2022-23 کے دوران بیرون ملک مقیم پاکستانیوں نے ملک کو 26 ارب ڈالر سے زائد کی ترسیلات بھیجیں، جو نہ صرف زرمبادلہ کا ایک اہم ذریعہ بنیں بلکہ ملک میں لاکھوں خاندانوں کے لیے سہارا بھی بنیں۔

ملک کی سطح پر سعودی عرب ترسیلات زر کا سب سے بڑا ذریعہ رہا، جہاں سے تقریباً 4.4 ارب امریکی ڈالر (کل ترسیلات کا 24 فیصد) پاکستان بھیجے گئے۔

متحدہ عرب امارات اور برطانیہ بالترتیب دوسرے اور تیسرے نمبر پر رہے، جن سے جولائی تا فروری مالی سال 2024 کے دوران 3.1 ارب 17 فیصداور 2.7 ارب 15 فیصد ڈالر پاکستان آئے۔

بیرونِ ملک مقیم پاکستانی پاکستانی کمپنیوں اور رئیل اسٹیٹ میں سرمایہ کاری کرتے ہیں، جس سے روزگار کے مواقع پیدا ہوتے ہیں اور معاشی ترقی کو فروغ ملتا ہے

ان کی مالی سرمایہ کاری ملک کے بنیادی ڈھانچے، تعلیم اور صحت کے نظام کو بہتر بنانے میں مدد دے سکتی ہے، اور بیرونی سرمایہ کاروں کے لیے پاکستان کو ایک پرکشش مقام بنانے میں کردار ادا کر سکتی ہے۔

بیرونِ ملک مقیم پاکستانیوں کی جانب سے میزبان ممالک میں کی جانے والی سیاسی و سفارتی سرگرمیاں پاکستان کی خارجہ پالیسی پر اہم اثر ڈال سکتی ہیں۔

امریکہ میں مقیم پاکستانی امریکی کمیونٹی نے مختلف سطحوں پر امریکی کانگریس سے رابطے کیے، جن میں پاک-امریکہ تعلقات، مسئلہ کشمیر، اور انسانی حقوق جیسے موضوعات شامل ہیں۔