وزیر اعظم کا بلوچستان کے خونی ٹریک کو ہائی وے بنانے کا اعلان

اسلام آباد: وزیراعظم شہباز شریف نے کہا ہے کہ بلوچستان کے خونی ٹریک کو ہائی وے بنانے جا رہے ہیں۔

وزیر اعظم نے جناح اسکوائر انڈرپاس کے سنگ بنیاد کی تقریب سے خطاب میں کہا کہ بلوچستان میں سڑکوں کے منصوبے کی مخالفت کرنے والے تنگ نظر ہیں، کراچی، قلات، خضدار اور کوئٹہ شاہراہ منصوبہ اعلیٰ معیار کے مطابق مکمل کریں گے۔

وزیراعظم نےکہا کہ بلوچستان کی اس سڑک کو جسے خونی ٹریک بھی کہا جا تا ہے ، ہائی وے بنانے جارہے ہیں، اس کی کوالٹی موٹر وے جیسی ہوگی، 2 سال میں 300 ارب سے زائد کے تخمینے سے شاہراہ تعمیر ہوگی۔

مزید پڑھیں:وزیراعظم شہباز شریف کا منسک کے قریب بیلاز فیکٹری کا دورہ

مزید پڑھیں:گورنر سندھ کا وزیراعظم شہباز شریف کو اہم خط

انہوں نے کہا کہ بلوچستان کےعوام کو ایسا منصوبہ چاہیے تھا جو تمام اقوام کےدل کی آواز ہو، این ایف سی میں بھی بلوچستان کاکوٹا ڈبل کردیا گیا ہے۔

شہباز شریف کا مزید کہنا تھا کہ تمام صوبوں کو ساتھ لے کر چلنا حکومت اور مسلح افواج کا وژن ہے، ٹیم ورک سے ملکی معیشت مستحکم ہوگئی ہے، اب ہم ترقی و خوش حالی کے سفر پر گامزن ہیں۔

 وزیراعظم نے مزید کہا کہ اسلام آباد میں توسیع و تزین کے وسیع و عریض منصوبے جاری ہیں، ٹریفک کےبہاؤ میں بہتری آچکی ہے، بہترین اقدامات کے لیے محسن نقوی مبارکباد کے مستحق ہیں۔

انکا مزید کہنا تھا کہ بہترین کاوشوں کے نتیجے میں پاکستان کی عالمی سطح پر درجہ بندی میں بہتری آئی، پاکستان کی تکمیل تمام اکائیوں سے ہوتی ہے۔

خیال رہے کہ وزیراعظم نے گزشتہ دنوں کہا تھا کہ  تیل کی قیمتیں کم ہوئی ہیں، اس کا فائدہ عوام کو منتقل کرنے کے بجائے بلوچستان پرلگائیں گے۔