ترجمان پاک فوج کا کشمیر پر دو ٹوک موقف سامنے آگیا

راولپنڈی: ترجمان پاک فوج ڈی جی آئی ایس پی آر کا برطانوی میڈیا کو انٹرویو میں کشمیر پر دو ٹوک موقف سامنے آگیا ہے۔

ترجمان پاک فوج کے مطابق بھارت کی جانب سے جنگ بندی کی خلاف ورزی کی صورت میں تیز اور یقینی جواب کا عزم کا اظہار کیا گیا ہے۔

لیفٹیننٹ جنرل احمد شریف چوہدری نے اسکائی نیوز سے بات کرتے ہوئے کہاکہ جو بھی ہماری سرزمین، سالمیت اور خود مختاری کی خلاف ورزی کرنے کی کوشش کرے گا، ہمارا جواب بے رحمانہ ہو گا۔

مزید پڑھیں:جب پاکستان اپنے دفاع میں کارروائی کرے گا تو دنیا دیکھے گی ، ڈی جی آئی ایس پی آر

ڈی جی آئی ایس پی آر نے انتباہ کرتے ہوئے کہا کہ پاکستان اور بھارت دونوں ایٹمی طاقت ہیں سنگین کشیدگی تباہی کا باعث ہو گی، اگر بھارت سمجھتا ہے کہ وہ پاکستان کے خلاف جنگ کا محاذ کھڑا کر سکتا ہے تو یہ خطے میں تباہی کا باعث ہوگا۔

انکا کہنا تھا کہ امریکا جیسے ممالک جوہری خطرات کے پیش نظر بھارت کے عزائم کو بخوبی جان چکے ہیں، بھارت اس مسئلے کو "اندرونی” معاملہ قرار دیکر بھاری فوج کی موجودگی کے ساتھ کشمیریوں کو "ہراساں” کر رہا ہے۔

ڈی جی آئی ایس پی آر نے مزید کہا کہ مسئلہ کشمیر کو اقوام متحدہ کی سلامتی کونسل کی قرارداد کے مطابق کشمیری عوام کو حل کرنا ہو گا۔

دوسری جانب اسکائی نیوز کا کہنا ہے کہ پاکستانی موقف کے مطابق اس نے بھارت کی بہت بڑی مسلح افواج کے باوجود ایک بہت بڑی فوجی فتح حاصل کی ہے۔

برطانوی نیوز کے مطابق بھارت اس بات پر ناراض ہے کہ امریکا اس بحران کے دوران مسئلہ کشمیر کو اجاگر کر رہا ہے ، امریکا کیلئے اصل امتحان یہ ہے کہ وہ بھارت پر کتنا دباؤ ڈال سکتا ہے؟