ڈیجٹیل دہشت گردی، پاکستان کا سوشل میڈیا کمپنیوں سے صارفین کا ڈیٹا شیئر کرنے کا مطالبہ

اسلا آباد: پاکستان نے ڈیجٹیل دہشت گردی کے خلاف عالمی تعاون کی اپیل کرتے ہوئے سوشل میڈیا کمپنیوں سے صارفین کے ڈیٹا شیئرنگ کا مطالبہ کردیا۔

تفصیلات کے مطابق وزیر مملکت برائے داخلہ طلال چودھری اور وزیرمملکت قانون وانصاف بیرسٹر عقیل نے پریس کانفرنس کی۔

طلال چودھری کا کہنا تھا کہ آزادی اظہار کو خاموش نہیں بلکہ دہشت گردی کے خلاف دیواربنارہے ہیں، پاکستان عالمی سطح پر دہشت گردی کے خلاف مضبوط مورچہ ہے۔

وزیر مملکت برائے داخلہ کا کہنا تھا کہ دہشت گردی سےمنسلک سوشل میڈیاکے سیکڑوں اکاؤنٹس کا پتا لگایا ہے، کالعدم تنظیمیں سوشل میڈیا کے ذریعے بھرتیاں کر رہی ہیں، سوشل میڈیا پر دہشت گردی سے متعلق 2417 شکایات زیرغور ہیں، سوشل میڈیا کمپنیوں کو اے آئی کے ذریعے دہشت گرد مواد فوراً ہٹانا ہوگا۔

بیرسٹر عقیل نے ڈیجیٹل دہشت گردی کے خلاف عالمی تعاون کی اپیل کرتے ہوئے سوشل میڈیا کمپنیوں سے ڈیٹا شیئرنگ اور تعاون کا مطالبہ کیا، دہشت گرد پروپیگنڈا پیکا کے تحت قابل سزا جرم ہے

ان کا کہنا تھا کہ پاکستان کی جانب سے غیر ملکی سوشل میڈیا کمپنیوں کو ملک میں دفاتر کھولنے کی دعوت دی، سوشل میڈیا پلیٹ فارمز دہشت گرد اکاؤنٹس کی بندش، خود کار بلاکنگ ،ڈیٹا تک رسائی دے۔

وزیر مملکت نے کہا کہ ٹی ٹی پی، آئی ایس کے پی، بی ایل اے اور بی ایل ایف سوشل میڈیا کے ذریعے پراپیگنڈا اورنوجوانوں کی بھرتی کر رہی ہیں۔

وزیر مملکت برائے داخلہ نے مزید کہا کہ ہم دہشت گردوں کے اکاؤنٹس کو بلاک کرناچاہتے ہیں، سوشل میڈیا پلیٹ فارمز صارفین کے ڈیٹا تک رسائی دے، سوشل میڈیا پلیٹ فارمز اکاؤنٹ ہولڈرز کی تفصیلات کو پاکستان سے شیئر کریں۔