نادرا نے عوام کیلئے ایک اور سہولت متعارف کروادی

نیشنل ڈیٹا بیس اینڈ رجسٹریشن اتھارٹی (نادرا) نے اپنے صارفین کے لیے ایک نئی سہولت متعارف کروائی ہے جس کے تحت اب شہری نادرا رجسٹریشن سینٹرز (NRCs) پر جانے سے پہلے موبائل ایپ کے ذریعے اپوائنٹمنٹ بک کروا سکتے ہیں۔

یہ سہولت نادرا کی پاک آئی ڈی موبائل ایپ میں شامل کی گئی ہے، جو اب تک شناختی کارڈ، نادرا کارڈ، بی فارم، فیملی رجسٹریشن سرٹیفیکیٹ (FRC) اور دیگر خدمات کے لیے استعمال ہو رہی تھی۔ اب اس ایپ کے ذریعے صارفین اپنے منتخب کردہ سینٹر اور وقت کے مطابق اپوائنٹمنٹ بک کر سکتے ہیں، جس سے انتظار کے اوقات میں کمی اور رش میں کمی آئے گی۔

اس فیچر کا آغاز ابتدائی طور پر ملک بھر کے 43 نادرا سینٹرز میں کیا گیا ہے، جن میں اسلام آباد، لاہور، کراچی، پشاور، کوئٹہ، ملتان، فیصل آباد، حیدرآباد، گوجرانوالہ، سکردو، گلگت، مظفرآباد، راولاکوٹ اور دیگر شامل ہیں۔

نادرا نے اس اقدام کو شہریوں کو بہتر سہولت فراہم کرنے اور خدمات کی ترسیل میں بہتری لانے کے لیے اٹھایا ہے۔ مستقبل میں اس فیچر کو مزید سینٹرز تک توسیع دینے اور ریئل ٹائم قطار کی معلومات فراہم کرنے کا بھی منصوبہ ہے۔

نادرا کی موبائل ایپ کو گوگل پلے اسٹور اور ایپل ایپ اسٹور سے ڈاؤن لوڈ کیا جا سکتا ہے۔ شہری ایپ کو اپ ڈیٹ رکھیں تاکہ نئی سہولت سے فائدہ اٹھا سکیں۔