پاؤڈر والا دودھ استعمال کرنے والے خبردار!! اہم خبر آگئی

پنجاب فوڈ اتھارٹی نے گجرات کے علاقے بھمبر روڈ قادر کالونی کے قریب گرینڈ آپریشن کے دوران جعلی دودھ کی سب سے بڑی کھیپ برآمد کر لی۔

 اتھارٹی کی کارروائی میں 32 ہزار 500 کلو مصنوعی ملک پاؤڈر اور 435 کلو پیکنگ میٹیریل ضبط کیا گیا، جبکہ خالی پیکنگ بیگز، مکسر مشین اور دیگر سامان بھی قبضے میں لے لیا گیا۔

پنجاب فوڈ اتھارٹی کے ترجمان کے مطابق یہ گودام روزانہ کی بنیاد پر کیمیکل اور مصنوعی اجزاء سے جعلی دودھ تیار کر کے گجرات شہر اور مضافاتی علاقوں میں سپلائی کر رہا تھا۔ آپریشن کے دوران موقع پر موجود افراد کے خلاف مقدمہ درج کر لیا گیا ہے جبکہ مزید تحقیقات جاری ہیں۔

حکام کا کہنا ہے کہ انسانی صحت سے کھیلنے والے عناصر کے خلاف زیرو ٹالرنس کی پالیسی اپنائی جائے گی اور اس نوعیت کے جرائم میں ملوث افراد کو کسی صورت معافی نہیں دی جائے گی۔

 فوڈ اتھارٹی نے شہریوں سے اپیل کی ہے کہ وہ دودھ یا دیگر خوراکی اشیاء کی مشکوک صورتحال کی فوری اطلاع متعلقہ حکام کو دیں، تاکہ عوام کو محفوظ، خالص اور معیاری خوراک کی فراہمی یقینی بنائی جا سکے۔