ٹرین میں سفر کرنے والوں کیلئے اہم خبر آگئی

وفاقی وزیر ریلوے حنیف عباسی نے اعلان کیا ہے کہ پنجاب کے 40 ریلوے اسٹیشنوں پر مسافروں کو مفت وائی فائی سروس فراہم کی جائے گی۔

 وفاقی وزیر ریلوے حنیف عباسی نے نجی ٹی وی سے گفتگو کرتے ہوئے کہا کہ حکومت پاکستان ریلوے میں گورننس کو بہتر بنانے اور جدید ٹیکنالوجی متعارف کرانے پر خصوصی توجہ دے رہی ہے۔

انہوں نے کہا کہ پنجاب حکومت پاکستان ریلوے میں 350 ارب روپے کی سرمایہ کاری کرے گی، جس کا مقصد صوبے بھر میں آٹھ برانچ روٹس کو اپ گریڈ کرنا ہے۔ اس منصوبے کے ذریعے ریلوے نظام کو جدید خطوط پر استوار کیا جائے گا تاکہ عوام کو محفوظ، آرام دہ اور تیز رفتار سفری سہولیات میسر آ سکیں۔

حنیف عباسی نے کہا کہ سندھ حکومت کے ساتھ بھی مختلف ریلوے روٹس کو اپ گریڈ کرنے کے لیے تعاون پر بات چیت جاری ہے۔ ML-1 منصوبہ جب مکمل طور پر فعال ہو جائے گا تو اس سے عوام کو نمایاں فوائد حاصل ہوں گے، جبکہ ML-2 میں سرمایہ کاری کی تیاریوں پر بھی کام جاری ہے۔