کراچی میں شوہر نے شک کی بنا پر بیوی کو قتل کر دیا

کراچی کے علاقے لیاری میں ایک شخص نے فون پر کسی سے بات کرنے کے شک میں اپنی بیوی کو گولی مار کر قتل کر دیا۔

پولیس کے مطابق یہ افسوسناک واقعہ لیاری میں پیش آیا، مقتولہ کی شناخت بختاور کے نام سے ہوئی ہے جو سات بچوں کی ماں تھیں اور ان کی عمر 45 سال تھی۔

ابتدائی اطلاعات کے مطابق میاں بیوی کے درمیان کسی بات پر شدید جھگڑا ہوا جس کے دوران ان کی اونچی آوازیں محلے والوں نے بھی سنیں۔ اسی دوران شوہرجس کی شناخت نواب کے نام سے ہوئی ہے، نے مبینہ طور پر پستول سے فائرنگ کر کے بختاور کو موت کے گھاٹ اتار دیا۔

علاقہ مکینوں نے فوری طور پر پولیس کو اطلاع دی جس پر پولیس موقع پر پہنچی اور ملزم نواب کو گرفتار کر لیا۔ پولیس نے اس کے قبضے سے ایک 30 بور پستول بھی برآمد کیا ہے جو قتل میں استعمال ہوا۔

تحقیقات کے مطابق نواب کو شبہ تھا کہ بختاور کسی سے فون پر بات کر رہی تھیں جبکہ یہ بھی بتایا جا رہا ہے کہ دونوں کے پاس صرف ایک ہی موبائل فون تھا جسے وہ مشترکہ طور پر استعمال کرتے تھے۔

بختاور ایک نجی اسکول میں مددگار کے طور پر کام کرتی تھیں۔ محلے کے ایک رہائشی نے مقامی میڈیا کو بتایا کہ نواب بظاہر ایک پُرامن اور خوش اخلاق شخص نظر آتا تھا۔مقتولہ اور ملزم کے سات بچے ہیں، جن میں چار بیٹیاں اور تین کم عمر بیٹے شامل ہیں۔

پولیس حکام کا کہنا ہے کہ اگر مقتولہ کا کوئی قریبی رشتہ دار آگے نہ آیا تو وہ ریاست کی جانب سے ابتدائی اطلاعی رپورٹ (ایف آئی آر) درج کریں گے اور ملزم کے خلاف قانونی کارروائی کا آغاز کیا جائے گا۔

افسوسناک طور پر بختاور کے اہلِ خانہ نہ تو مقدمہ درج کروانے کے لیے آگے آئے اور نہ ہی انہوں نے لاش وصول کرنے کی کوشش کی۔ محلے داروں نے اپنی مدد آپ کے تحت بختاور کی لاش کو مردہ خانے منتقل کروایا۔