امریکا دہشتگردی کو قابو کرنے میں پاکستان کی کامیابیوں کا معترف

پاکستان اور  امریکا نے انسداد دہشتگردی ڈائیلاگ کے مشترکہ اعلامیے میں  ہر قسم کی دہشتگردی کے خاتمے کے عزم کا اعادہ کیا ہے۔

امریکی سفارتخانے کی جانب سے جاری اعلامیے کے مطابق اسلام آباد میں امریکا پاکستان کاؤنٹر ٹیررازم ڈائیلاگ کا انعقاد کیا گیا، اجلاس کی مشترکہ صدارت نبیل منیر اور گریگوری لوگوفونے کی۔

اعلامیے کے مطابق ڈائیلاگ میں ہر قسم کی دہشتگردی کے خاتمے کے عزم کا اعادہ کیا گیا، فریقین نے بی ایل اے، داعش خراسان، ٹی ٹی پی کے خطرات سے نمٹنے پر زور دیا۔

  امریکا نے دہشتگردی کیخلاف پاکستان کی کامیابیوں کو سراہا، جعفر ایکسپریس، خضدار اسکول بس حملے میں جانی نقصان پر امریکا نے اظہار تعزیت کیا۔

اعلامیے کے مطابق امریکا نے علاقائی و عالمی امن کے لیے پاکستان کی قربانیوں کا اعتراف کیا، انسداد دہشتگردی کے لیے ادارہ جاتی ڈھانچے اور صلاحیتوں بڑھانے پر اتفاق کیا گیا، دہشتگردی میں ابھرتی ٹیکنالوجیز کے استعمال کی روک تھام پر زور دیا گیا۔

اقوام متحدہ سمیت عالمی فورمز پر تعاون جاری رکھنے کا اعلان کیا گیا، دیرپا امن و استحکام کے لیے باہمی روابط برقرار رکھنے پر اتفاق کیا گیا، انسداد دہشتگردی کے لیے پائیدار اور مؤثر حکمت عملی اپنانے پر زور دیا گیا۔