سوات میں اسکول پرنسپل کی حاضر دماغی سے 936 بچے سیلابی ریلے سے محفوظ

سوات میں طوفانی بارشوں اور سیلاب نے کئی علاقے لپیٹ میں لے لیے۔

ایک سرکاری اسکول کی عمارت بھی پانی کی زد میں آئی، لیکن پرنسپل کی بروقت حکمتِ عملی نے بڑی تباہی کو ٹال دیا۔

سیلابی ریلا اچانک اسکول کے قریب پہنچا تو پرنسپل نے گھبراہٹ کے بجائے حوصلے اور دانشمندی سے فیصلہ کیا اور 936 بچوں کو فوری طور پر محفوظ مقام پر منتقل کر دیا۔

پی ڈی ایم اے کے مطابق سوات کے مختلف علاقوں میں بارشوں اور سیلاب سے 22 افراد زندگی کی بازی ہار گئے، دو مکانات مکمل تباہ اور 49 کو جزوی نقصان پہنچا۔

رپورٹ کے مطابق 2 اسکول سیلاب میں بہہ گئے جبکہ 13 دیگر عمارتیں متاثر ہوئیں۔

اسی طرح بونیر میں شدید کلاؤڈ برسٹ کے نتیجے میں چھ تعلیمی اداروں کی عمارتیں زمین بوس ہو گئیں، مجموعی طور پر اس تباہی میں 401 افراد جاں بحق اور 671 شدید زخمی ہوئے۔

اس وقت ریسکیو کارروائیاں جاری ہیں اور پاک فوج کی امدادی ٹیمیں متاثرہ علاقوں میں لوگوں کو محفوظ مقامات پر منتقل کرنے اور بنیادی سہولیات فراہم کرنے میں مصروف ہیں۔