ملتان کے اطراف چناب خطرے کے لیول سے اوپر، سدھنائی کینال میں شگاف، 24 گھنٹے اہم

دریائے چناب میں ملتان کے قریب شیرشاہ کے مقام پر پانی اپنے انتہائی لیول کو عبور کرگیا۔ ہیڈ سدھنائی سے آنے والے ریلے سے شگاف پڑنے سے بڑی آبادی زیر آب آگئی۔

ملتان میں سدھنائی کینال میں ہیڈ سدھنائی سے آنے والے پانی کے دباؤ سے شگاف پڑنے سے بستی کھوکھراں سمیت بہت بڑی آبادی زیر آب آگئی۔

انتظامیہ کے مطابق سدھنائی کینال میں گنجائش سے 4 گنا زیادہ پانی آچکا، کینال میں پڑنے والے شگاف کو پر کرنے کی کوشش کی جا رہی ہے۔

دریائے راوی میں ہیڈ سدھنائی پر اونچے درجے کا سیلاب ہے، دریائے راوی کا پانی اوور فلو ہوکر رابطہ نہروں میں داخل ہونے سے ملتان روڈ پر رانگو نہر میں دو مقامات پر شگاف پڑ گئے۔ رانگو نہر کے شگاف سے درجنوں آبادیاں زیرِ آب آگئیں۔

دریائے چناب میں پانی کی سطح میں مسلسل اضافہ ہو رہا ہے، سیلابی ریلا ملتان کی حدود سے گزر رہا ہے جس کی وجہ سے اکبر فلڈ بند پر پانی کا دباؤ ہے۔

 محکمہ انہار پنجاب کے مطابق کہنا ہے اکبر فلڈ بند پر پانی کی سطح 414 فٹ ہو گئی، اکبر فلڈ بند پر پانی کی سطح 417 فٹ تک پہنچنے پر ہیڈ محمد والا پر شگاف ڈالا جائے گا۔

پانی بڑھنے سے اکبر پور، علمدی سورہ، بندہ سندیلہ، بستی بخش والا، بستی کوتوال مکمل ڈوب گئیں

محکمہ انہار کا بتانا ہے کہ ملتان میں شیر شاہ کے مقام پر پانی کا گیج 394 فٹ پر پہنچ گیا، شیر شاہ پر 395 پر گیج آنے پر پانی شیر شاہ پل کراس کر جائے گا۔

کمشنر ملتان کا کہنا ہے ہیڈ محمد والا پر پانی کی زیادہ سے زیادہ حد 417 فٹ ہے، شگاف ڈالنے کا فیصلہ ٹیکنیکل کمیٹی کرے گی، آبادی کو بچانے کے لیے ہنگامی اقدامات جاری ہیں، فلڈ ریلیف کیمپس میں متاثرہ افراد کی آمد کا سلسلہ جاری ہے۔

بورے والا، میلسی کے نشیبی علاقوں سے 95 فیصد انخلاء مکمل کر لیا گیا

ادھر بورے والا میں بھی دریائے ستلج میں سیلابی صورتحال برقرار ہے، دریائےستلج میں ہیڈ اسلام پر درمیانے اور جملیرا میں اونچے درجے کا سیلاب ہے۔

مقامی انتظامیہ کا کہنا ہے کہ بورے والا اور میلسی کے نشیبی علاقوں سے 95 فیصد انخلاء مکمل کر لیا گیا ہے۔

ڈائریکٹر جنرل پروونشل ڈیزاسٹر مینجمنٹ اتھارٹی (پی ڈی ایم اے) پنجاب عرفان علی کاٹھیا کے مطابق پنجاب کے تینوں دریاؤں میں سیلابی صورت حال کے باعث 13 لاکھ ایکٹر اراضی زیر آب ہے، ماضی میں ایسی مثال نہیں ملتی۔

ان کا کہنا تھا پنجاب کے 4 ہزار کے قریب دیہات متاثر ہیں، انسانی جانوں کا تحفظ ہماری اولین ترجیح ہے، اگلے 24 گھنٹے ملتان کے لیے بہت اہم ہیں۔

عرفان علی کاٹھیا کا کہنا تھا گجرات میں پہلی بار غیر متوقع بارشیں ہیں ہوئیں، گجرات میں بارشوں کی وجہ سے ریکسیو میں مشکلات کا سامنا ہے۔