پنجاب میں سیلابی صورت حال، قومی اورصوبائی اسمبلی کےضمنی الیکشن ملتوی

بارشوں اور سیلاب کے باعث پنجاب میں قومی اور صوبائی اسمبلی کے ضمنی انتخابات ملتوی کردیےگئے ہیں۔

ضمنی الیکشن ملتوی کرنے کے حوالے سے الیکشن کمیشن سے اعلامیہ جاری کردیا گیا۔

الیکشن کمیشن کے مطابق این اے 66 وزیرآباد، این اے 96 فیصل آباد، این اے104فیصل آباد، این اے 129 لاہور، این اے 143 ساہیوال میں ضمنی انتخابات ملتوی کیےگئے۔

پی پی 73 سرگودھا، پی پی 87 میانوالی، پی پی 98 فیصل آباد، پی پی 203 ساہیوال میں بھی ضمنی الیکشن ملتوی کردیےگئے۔

الیکشن کمیشن کے مطابق پنجاب میں سیلاب کے باعث مواصلات کا نظام درہم برہم ہے، سیلاب کے باعث پنجاب میں سرکاری اور نجی انفرااسٹرکچر تباہ ہوا ہے، سیلاب سے سرکاری اسکولوں کی عمارتیں بھی تباہ ہوئی ہیں، یہ عمارتیں پولنگ اسٹیشن کے قیام اور الیکشن ریکارڈ اسٹور کے لیے استعمال ہوتی ہیں۔

الیکشن کمیشن کا کہنا ہےکہ سول انتظامیہ، قانون نافذ کرنے والے ادارے، ریسکیو اور ریلیف آپریشن میں مصروف ہیں، انتظامیہ کے لیے الیکشن ڈیوٹی انجام دینا مشکل ہے، ڈسٹرکٹ ریٹرننگ افسران نے آگاہ کیا ہے کہ پولنگ اسٹاف ریلیف آپریشنز میں مصروف ہے، ڈسٹرکٹ ریٹرننگ افسران نے نئے پولنگ افسران کی تقرری کی درخواست کی ہے۔

الیکشن کمیشن کے مطابق پنجاب حکومت نے بھی ضمنی الیکشن ملتوی کرانےکی درخواست کی ہے۔

الیکشن کمیشن کے مطابق ضمنی الیکشن کے لیے تقرر کردہ پولنگ اسٹاف کا تعلق مختلف سرکاری محکموں سے ہے، سیلاب ریلیف آپریشن میں مصروفیات کے باعث پولنگ افسران دستیاب نہیں ہیں، سیلاب سے متاثرہ حلقوں کے لوگ اپنا حق رائےدہی استعمال نہیں کرسکیں گے، انفرااسٹرکچر کو نقصان اور بےگھر ووٹرز کی وجہ سے الیکشن کا انعقاد ممکن نہیں ہے۔ حالات معمول پر آنےکے بعد الیکشن عمل کا دوبارہ آغاز کردیا جائےگا۔