کیا آپ مفت پلاٹ اسکیم کے اہل ہیں؟ اہلیت چیک کرنے کا طریقہ سامنے آگیا

وزیراعلیٰ پنجاب مریم نواز نے ’’اپنی زمین، اپنا گھر‘‘ پروگرام کے تحت 3 مرلہ پلاٹ اسکیم 2025 کا باقاعدہ آغاز کر دیا ہے، جس کا مقصد کم آمدنی اور بے زمین خاندانوں کو محفوظ رہائشی زمین فراہم کرنا اور سماجی فلاح و بہبود کو فروغ دینا ہے۔

 اس اسکیم کے پہلے مرحلے میں صوبے کے 19 اضلاع میں 23 سرکاری اسکیموں کے تحت 2 ہزار پلاٹس الاٹ کیے جائیں گے۔ درخواست دینے کا عمل مکمل طور پر ڈیجیٹل کیا گیا ہے اور اسے سرکاری AZAG ای پورٹل کے ذریعے شفاف اور آسان بنایا گیا ہے۔

اس اسکیم کے لیے درخواست دہندہ کا پنجاب کا مستقل رہائشی ہونا ضروری ہے اور وہ صرف اپنے ضلع میں ہی درخواست دے سکتا ہے۔ درخواست دہندہ یا اس کے اہل خانہ کے نام پاکستان میں کوئی جائیداد نہیں ہونی چاہیے، نیز کسی قسم کا کریمنل ریکارڈ، قانونی تنازع یا بینک ڈیفالٹ بھی نہیں ہونا چاہیے۔ تمام معلومات درست ہونی چاہئیں، ورنہ درخواست مسترد ہو جائے گی۔

شرائط کے مطابق پلاٹ پر چھ ماہ کے اندر تعمیر شروع کرنا اور دو سال کے اندر مکمل کرنا لازمی ہے جبکہ پلاٹ کو پانچ سال تک فروخت، ٹرانسفر یا لیز پر نہیں دیا جا سکتا۔ زمین صرف رہائشی مقاصد کے لیے استعمال کی جائے گی اور کسی بھی شرط کی خلاف ورزی کی صورت میں پلاٹ منسوخ کر کے بغیر معاوضہ واپس لے لیا جائے گا۔ پنجاب ہاؤسنگ اینڈ ٹاؤن پلاننگ ایجنسی معائنہ کرے گی اور شکایات کے ازالے کے لیے خصوصی کمیٹی قائم کی جائے گی۔

اہلیت رکھنے والے افراد کو سرکاری ای پورٹل پر رجسٹریشن کر کے شناختی کارڈ، آمدنی کا ثبوت اور جائیداد نہ ہونے کا حلفیہ بیان اپلوڈ کرنا ہوگا۔ درخواستوں کی جانچ پڑتال کے بعد حقدار امیدواروں کو شارٹ لسٹ کیا جائے گا۔ یہ اسکیم پنجاب حکومت کے اس عزم کا مظہر ہے کہ محروم طبقات کو نہ صرف چھت فراہم کی جائے بلکہ ان کے معیار زندگی میں بھی بہتری لائی جائے اور سماجی انصاف کو یقینی بنایا جائے۔