میئر کراچی نے تیز بارش کی صورت میں شہریوں سے اپیل کر دی

میئر کراچی مرتضیٰ وہاب نے ممکنہ بارشوں کے پیش نظر شہریوں سے اپیل کی ہے کہ تیز بارش کی صورت میں گھبرا کر ایک ساتھ دفاتر، دکانوں اور گھروں سے باہر نہ نکلیں۔

میئر کراچی مرتضیٰ وہاب نے پریس کانفرنس کرتے ہوئے کہا کہ اس رویے سے سڑکوں پر شدید ٹریفک جام کی صورتحال پیدا ہوجاتی ہے۔

انہوں نے کہا کہ بارش کے باعث فلڈنگ کی صورتحال سے نمٹنے کیلئے اقدامات مکمل کرلیے گئے ہیں، نالوں کی صفائی کا عمل اطمینان بخش ہے جبکہ گجر نالہ، محمود آباد نالہ اور دیگر بڑے نالوں پر صفائی مکمل ہوچکی ہے۔

مرتضیٰ وہاب کا کہنا تھا کہ کے ایم سی کے 43 بڑے نالوں پر بھی کام کیا گیا ہے، جبکہ 14 انڈر پاسز میں پمپ نصب کیے گئے ہیں تاکہ فوری نکاسی ممکن ہو سکے، اس کے ساتھ نشیبی علاقوں میں عملہ اور مشینری تعینات کردی گئی ہے، اور واٹر اینڈ سیوریج بورڈ کی 120 گاڑیاں بھی نکاسی کے عمل میں شریک ہوں گی۔

انہوں نے مزید بتایا کہ اہم چوکنگ پوائنٹس پر ریلیف کیمپس قائم کیے گئے ہیں جہاں شہریوں کے لیے پانی، بسکٹ اور دیگر ضروری اشیاء رکھی گئی ہیں تاکہ اگر کوئی بارش کے دوران پھنس جائے تو وہاں عارضی طور پر ٹھہر سکے۔

میئر کراچی نے شہریوں سے ایک بار پھر گزارش کی کہ اگر تیز بارش ہو تو گھبراکر ایک ساتھ دفاتر اور گھروں سے نہ نکلیں، لوگوں کے گھبرا کر ایک ساتھ ورک پلیسز سے نکلنے سے سڑکیں جام ہوجاتی ہیں، 19 اگست کی بارش میں بھی شہریوں کے ایک ساتھ نکلنے کے باعث شاہراہیں بند ہوگئی تھیں، اسی تجربے کو مدنظر رکھتے ہوئے شہریوں سے تعاون کی درخواست کی جارہی ہے۔

میئر کراچی نے کہا کہ گزشتہ بارش کے چند گھنٹوں میں ہی سڑکیں کلیئر کردی گئی تھیں اور اس بار بھی بھرپور تیاری ہے۔ "بارش ہمارے لیے چیلنج ضرور ہے لیکن ہمارا عملہ مکمل طور پر متحرک ہے۔ ہمیں نالوں کی کیپسٹی اور نکاسی کے مسائل سے نمٹنا ہے اور اس حوالے سے میڈیا کے تعاون کی بھی ضرورت ہے۔”