بڑا جھٹکا، سولر پینلز استعمال کرنے والے صارفین کیلئے نیا حکم نامہ آگیا

لاہور الیکٹرک سپلائی کمپنی (لیسکو) نے سولر انرجی استعمال کرنے والے صارفین کے لیے اہم فیصلہ کرتے ہوئے اعلان کیا ہے کہ اب صرف اے ایم آئی (ایڈوانس میٹرنگ انفراسٹرکچر) میٹر ہی سولر کنکشنز کے ساتھ نصب کیے جائیں گے۔

 کمپنی کی جانب سے جاری کردہ نوٹیفکیشن میں واضح کیا گیا ہے کہ سولر صارفین کے لیے یہ میٹر لگانا لازمی ہوگا۔ اے ایم آئی میٹر کی قیمت اب 70 ہزار روپے مقرر کی گئی ہے، جو اس سے قبل تقریباً 35 ہزار روپے تھی۔ اس فیصلے سے سولر صارفین پر لاگت کا دگنا بوجھ پڑے گا۔

 مزید برآں، وزارتِ توانائی کی ہدایت پر نئے سولر کنکشنز کی درخواستیں عارضی طور پر روک دی گئی ہیں، جس سے متبادل توانائی کی جانب رجحان رکھنے والے صارفین میں بے چینی بڑھ گئی ہے۔

دوسری جانب، پنجاب کے ضلع راجن پور میں سولر پینلز کی چوری کے واقعات نے صورت حال کو مزید پیچیدہ بنا دیا ہے۔ حالیہ رپورٹس کے مطابق 2022 اور 2023 کے دوران راجن پور کے کم از کم 50 اسکولوں سے سولر پینلز غائب ہو چکے ہیں۔ پنجاب پبلک اکاؤنٹس کمیٹی (پی اے سی) نے اس سنگین معاملے کا نوٹس لیتے ہوئے پولیس کو فوری تحقیقات کی ہدایت جاری کر دی ہے۔

پی اے سی کے اجلاس کی صدارت کرتے ہوئے تنزیل اسلم ملک نے شدید برہمی کا اظہار کیا اور کہا کہ تعلیمی اداروں میں نصب قیمتی پینلز کی چوری متعلقہ انتظامیہ کی مجرمانہ غفلت کا نتیجہ ہے۔

 کمیٹی نے محکمہ تعلیم پر تنقید کرتے ہوئے کہا کہ اپنی ذمہ داری قبول کرنے کے بجائے معاملے کا بوجھ ضلعی ہیلتھ اتھارٹیز پر ڈالنا قابل قبول نہیں۔ کمیٹی نے ہدایت دی کہ فوری طور پر رپورٹ پیش کی جائے کہ کتنے اسکولوں میں پینلز چوری ہوئے، کتنے واپس بحال کیے گئے اور ذمہ داروں کے خلاف کیا کارروائی کی گئی۔

یہ تمام پیش رفت ایسے وقت میں سامنے آئی ہے جب حکومت متبادل توانائی کو فروغ دینے کی دعوے دار ہے، تاہم بڑھتی ہوئی قیمتیں، چوری کے واقعات اور پالیسی کی غیر یقینی صورتحال نے عوام میں اضطراب پیدا کر دیا ہے۔